KHAWTHLIR

Ṭanpuina hlan

Central YMA chuan February 24, 2025-a Sajek tlangdunga Mahmuam khua, Bangladesh-a kângmei chhuaka Mizo in 18 kâng tuarte ṭanpuina atan nimin khan YMA, Sajek Branch hruaitute hnenah Rs 5,11, 800 an hlan. Mahmuam khuaah hian in 60 vel a kâng a, Mizo chhungkaw chenna in 18 chu bungraw chuh hman lohin a kâng ral a ni.

CM leh AMVCA

Chief minister Lalduhoma chu nimin khan a pisaah All Mizoram Village Council Association hruaitute nen an inkâwm. Chief Minister chuan, mipui tana hna thawk tura thlan an ni tih hre reng a, thlei bik nei loa khua leh tuite tan thawk ṭhin turin VC-te a chah. AMVCA hruaitute hian an mamawhte an thlen nghal a ni.

Ahilyabai Holkar pualin hun hmang

BJP, Mizoram Pradesh chuan nimin khan Ahilyabai Holkar pian champha vawi 300-na pualin a chanchin zirhona an buatsaih. Thusawitu BJP president Vanlalhmuaka chuan, Ahilyabai Holkar chu nu ropui, India hmeichhe zinga hmeichhe ropui ber pawl a nih thu sawiin, "India hian kan chawimawi tawk lo a, a hnathawh leh hmalaknate a ropui hle a ni," a ti.

Hmun zawng dawn

Mizo Territorial Army dinna tura hmalakna kal mekah nimin khan Mizoram sorkarin ram leh a ṭul dangte ngaihtuah tura a din Coordination & Land Search Committee chu Secretariat conference hall-ah an chairman Lt. Col. Clement Lalhmingthanga hoin an ṭhukhawm. Territorial Army company pahnihte awm lailawkna tur hmun Aizawl leh Lungleiah zawn ni se, an ti.

Kawngpui thian fai

Urban Development & Poverty Alleviation department chuan nimin zing khan Kaladan Multi-Modal Transit Transport Project (KMMTTP) kawngpui dungah 'Voluntary Cleanliness Drive' an huaihawt. Drive-ah hian mi ṭhahnem tak thawk chhuakin, KMMTTP kawngpui dung leh luikawra bawlhhlawhte an thian fai a ni.