Ram neitute hnenah property card hlan; Ram teh thuah a awm tawh dawn lo - Minister

Land Revenue & Settlement (LRS) minister B Lalchhanzova chuan nimin khan Secretariat conference hall-ah Survey of Villages and Mapping with Improvised Technology in Village Areas (SVAMITVA) scheme hnuaia Aizawl district-a khaw 16 mipui hnenah an ram neitu nihna nemnghettu property card a hlan a; ram teh thuah a awm tawh dawn loh thu a sawi.

LRS Minister chuan, data base changtlung tak GIS nena thlun zawm neih a ni taawh tih sawiin, "Property card bo emaw, inruk sak tihahte thlaphânna tur a awm lo, a chhan chu sorkarin an ram chhinchhiahna felfai tak a neih vang a ni. Ram inteh thuah pawh a awm tawh dawn lo. Khaw ṭhenkhatah thu hriat fuh tawk loh vangin property la duh lote an awm. Zangnadawmna emaw thil danga mamawhna hmanhmawhthlak a awm pawhin department tan chêt thut a harsa a nih pawhin hriatthiam an ngai dawn," a ti.

SVAMITVA chu central scheme ṭha a nih thu sawiin Minister chuan, "Survey of India nen ṭangkawpin drone hmanga survey kalpui a nih hnuah Mizoram sorkar chuan chu thlalak chu leilunga endik hna a kalpui. Khaw tinah mipui ko khawmin VC-te nen mimal ramrite chu tihfel ṭhin a ni. Property card hi LSC nen a hming chauh a danglam," a ti a; ram lei leh hralh, loan lak nan leh zangnadawmna lakna atante pawh hman theih vek a nih thu a sawi.

B Lalchhanzova chuan, ZPM sorkar hnuah LRS department-in nasa takin hma a sawn tih sawiin, "Thawktute inpek vang leh Chief Minister-in LRS department chu a ngaih pawimawh vang a ni. Kan CM hian department pawimawhzia hriain, hna kan thawh theihna turin ruahmanna lian tak min neihpui mek a, chu chuan thawktuteah phûrna leh chona nasa tak a thlen mek a ni," a ti a; LRS department-a thawktute chu mipui laka hawihhâwm zir zel turin a chah.

Nimina property card pek chhuah hi 1,777 a ni a; ram teh tawh property card chhuak ve rih lote chu document thehluh kim loh vang a ni tlangpui a, VC kaltlanga ngaihven theih a ni.