Ruihhlo donaa ṭan lak zel dan tur Excise leh CADS hotute'n an sawiho

Excise & Narcotics department (END) hotute leh Central YMA hnuaia ruihhlo dotu Central Anti-Drugs Squad (CADS) hruaitute chuan nimin khan END conference hall-ah ruihhlo do leh a kaihhnawih thilte an sawiho.

END joint commissioner Peter Zohmingthanga chuan, ruihhlo donaah dan anga hmalak a pawimawh thu sawiin, "Dan ang chuan END leh Police-te chiah hi state atan ruihhlo man tura thuneihna nei an ni. Amaherawh chu, YMA hi mit, beng leh kut ngah zawk in ni a, information in dawng a nih chuan mahni ṭhahnemngaihnaa hma la mai loin, END emaw Police emaw duty hnai ber hnenah hriattir vat tur a ni. Information petute nihna thup tlat a nih bakah, sorkar aṭangin lawmman pek ṭhin a ni," a ti a; information dik lo petute erawh chu dan anga hrem theih a nih thu a sawi.

Sawihona kaihruaitu END deputy commissioner Ngurthanzama chuan, tun hnaia Ṭawngṭai Bethel Camping Centre aṭanga mi tam tak an chhuah avangin ruihhlo donaah thawhhona ṭha lehzual neih a ṭul thu a sawi a, "Hmalakna tur tam tak kan nei a, keimahni ṭhahnemngaihna zâwn ṭheuhah insut buai palh theih a ni a, kan hmalaknate kan inhriatpuia kan thawhho ṭhat a ngai dawn a ni," a ti.

CADS convener Roneihthanga, CYMA treasurer chuan, "CADS member-te hian mahni in lum pawh thlahlel hlei thei loin, hlawh nei miah loin kan ram himna atana rim takin ruihhlo dona kawnga hma kan la ṭhin," a ti a; khawtlang himna atan END nen thawhhona ṭha tak an neih thu a sawi.

Sawihonaah hian END officer 18 leh CADS member 20 an tel a; ruihhloin Mizoram leh Mizo ṭhalaite a tihchhiat nasa dan leh chumi venna atana theihtawp chhuaha thawhho zel dan tur an sawi a; ruihhlo donaah mipui leh tlawmngai pawl dangte puihna an ngen a ni.