CYMA-in HSLC & HSSLC top 10 lawmpui

Central YMA chuan nimin khan CYMA Hall-ah kumin HSLC leh HSSLC-a top 10-a tling Mizo zirlaite chawi-mawina thilpek an hlan.

Chawimawina inkhawmah hian CYMA president Lalhmachhuana chuan, Mizo ṭhalaite rui thle mai mai vek an ni lo tih sawiin, "Entawn tlak tak tak, taima leh thawk rim kan awm. Ram leh hnam tana hmabak nei ṭha tak takte hi YMA chuan beiseina sang takin kan thlir che u a ni," a ti.

Fuihna thu sawitu Lalmalsawma Pachuau, IRS chuan, zirlai ṭha bikte'n ram leh hnam hmangaihna rilru nen lehkha an zir a ṭul thu a sawi a, "A thiam bik ni ve pha lote tan mawhphurna kan nei a, an tan kawng kawhhmuhtu kan ni tur a ni," tiin, rilru puthmang dik nen hmasawn thei tura zir zel turin a fuih.

Lalmalsawma Pachuau chuan, lehkhabu chhiar tam tur leh writing skill nei ṭha tura inzir zel turin zirlaite a chah a; exam ṭha taka an hmachhawn theih nan inruahman ṭha tur te, mi dang nena inpawhna ṭha nei thiam tur te, inthununna nei tur leh theihtawp chhuah turin a fuih bawk.

Central YMA-in chawimawina a hlante hi mi 59 an niin, HSLC-ah mi 22 leh HSSLC-ah mi 37 an ni a, chawimawina atan pawisa leh thilpek dang hlan an ni.