Intellectual Property Rights zirho

Mizoram Science, Technology & Innovation Council (MISTIC) leh Hrangbana College chuan nimin khan IPT auditorium-ah Intellectual Property Rights chungchang zirhona an buatsaih a; a neitu phalna la hmasa loa mi thu ziak leh mi kutchhuak mahni ta anga hman leh thehdarh chu dan kalh a nih thute tarlan a ni.

Seminar-ah hian youtuber, zaithiam, hla phuah thiam, lemziak thiam leh thuziak ṭhinte an tel a, sawihona hun leh zawhna leh chhanna hun hman a ni. HBC Prof. Lalbiakzuali, associate professor Dr Rosalind Varsangzuali leh assistant professor Lalrinngheta ten an kaihruai a; MISTIC scientific officer Joel Lalbiakkima leh project scientist-I C Laltlanzuala ten Intellectual Property Right leh copyright chungchang an sawifiah.

A neitu phalna la hmasa loa mi thu ziak leh mi kutchhuak mahni ta anga hman leh thehdarh chu dan kalh a nih thute tarlan a ni a; technology a sân tawh avangin ho tê têah mi eizawnna intihchhiatsakna a tam a, fimkhur a ṭul thu te, thil ho têa ngaih pawh sumdawn nan leh eizawn nan hman zel a nih tawh avangin mi tih dan entawn ngawt a him loh thute tarlan a ni bawk.

Zirhonaah hian chief scientific officer H Lalsawmliana'n HBC Mizo department buatsaih 'Valzotea Rûn Mawi (Valzotea Hla leh a zir zauna)' tih lehkhabu a tlangzarh.