Saitualah Air Raid Mock Drill buatsaih

Saitual District Civil Defense Advisory Committee-in a lo rel tawh angin nimin khan Saitualah boruak aṭanga beih tawh thulha chêt lak dan tur nunchan zirna, 'Air raid mock drill' neih a ni.

Mock drill-ah hian Selchhunga Primary School, Saitual chu boruak aṭanga beih (air strike) tawhna hmun atan hman a ni a, sikula awm zirtirtute leh zirlaite hliamte chu Quick Response Team-te'n an chhan chhuak a ni.

Nimin vek khan Khawzawl Higher Secondary School-ah ruihhlo ṭhat lohzia leh indo vanga boruak aṭanga beihna chungchang inzirtirna hun hman a ni a; ruihhlo chi hrang hrang chungchang te, dan hnuaia hremna te, taksa tana a ṭhat lohna te, mimal leh khawtlang a khawih chhiat dante inzirtir niin, ruihhlo laka fihlim turin zirlaite chah an ni. Chhiatna thlenga tih tur pawimawhte inhrilh a ni bawk.

Khawzawlah hian boruaka beihna a thlen palha awm dan tur leh ruihhlo ṭhat lohzia inzirtirna hi hmun hrang hrangah neih buatsaih zel tum a ni.