Chief Minister zin haw MNF-in an hmuak

Chief minister Zoramthanga chu hun eng emaw chen Delhi-ah sorkar thil pawimawh tia a chàm hnuah nimin khan a rawn haw a, Lengpui Airport-ah MNF party-te'n an vice president Lalthleng­liana hoin an lo hmuak.

Lengpui Airport tualah thu sawiin Chief Minister chuan, Union Home Minister-in an chah avanga zin a nih thu a sawi a, "Bru unaute Tripura-a sing tel kum 20 chuang lo awm tawhte'n he lama lo chhoh an duh a, keini pawhin hawihháwm takin kan lo chhawn thei a ni. Kum 1967/68/69 chho velah general Thangliana hoa cheng reng an ni a, keini'n remna kan neih khan an zuih hret a, Tripura-a an hmunpuia awm khawm duhte pawh an awm," a ti.

Tripura-a an chhukna chhanah tumahin an koh thlak an tih duh loh thu sawiin Zoramthanga chuan, "An mithiamte chuan an MP/MLA leh inthlan dangah vote nei tam ila tih chu an duh ber niin a lang. Bru lehkha thiam rual, an hotute hian opposition-a kan awm lai, 1990 chho velah pawh min rawn hmu ṭhin. Human right hoin an nawr avangin, Tripura sorkar leh central sorkar pawhin he lama rawn chho turin an ti reng a ni," a ti a, Tripura-ah awm nghet law law se tih chu a duh dan sa a nih reng thu a sawi.

Chief Minister chuan, Bru-te Tripura-a awm hlentir turin Home Ministry leh Tripura sor­kar an nawr thu sawiin, "Ṭawngkam mai ni lo, ziakin ka thlen. Theihtawpa kan nawr angin kan hlawhtling ta a, Tripura CM, Home Ministry, Bru hruaitu te, state pahnih chief secretary te, joint secretary, north east changtute nen kan inrem ta a ni. Kum 20 chuang harsatna lian tak kan neih kha kan solve ta a, solve ni lo ta se, a hautak hle ang. Kan theih tawka kan tih Pathianin mal min sawm a ni," a ti.

MZU southern campus chung­chang sawiin Chief Minister chuan, "Kan MZU hi kan tâwt lutuk a, chhak leh thlangahte awm se kan duh. Dr Thangtea te nen theihtawp chhuaha kan nawr a ni," a ti a; MZU southern campus hawnna tur a awm ta chu lawmawm an tih thu a sawi.

Burma MP (Aung San Suu Kyi pawla mi) Arakan Army underground-te'n ni 70 chuang thi tura ngaih an kawl tawh chu a hnena an sawi avangin, theihtawpa palai tirin a nawr thu sawiin Zoramthanga chuan, "Thi ta anga ngaih hial dama an rawn chhuah leh ta chu an lawm hle a, keini pawh kan lawm a ni. February 20 khi Chin National Day a ni a, tah chuan tel turin min rawn sáwm a, mahse, session lai a nih bakah kan State Day a nih avangin ka tel loh tur thu ka hrilh a, pawi an ti hle a ni,"  a ti.