Home/centre ten skill development an kalpuina atan sorkarin puih a inhuam - CM

Chief minister Lalduhoma chuan, home/centre-a enkawl ruihhlo ngaite an dam chhuah tak tak theih nan after-care skill development ngaih pawimawh a ṭul thu leh, skill development kalpuina atan sorkarin home/centre-te puih a inhuam thu a sawi.

CM Lalduhoma hi Social Welfare minister Lalrinpuii leh department hotute nen May 16, 2025 khan CMO-ah an inkâwm a, Mizorama ruihhlo hluar zel dona leh ruihhlo ngaite enkawl dan tur chungchang an sawiho a ni.

Lalduhoma chuan, "Ruihhlo ngai center-a awmte an dam chhuah tak tak theih nan after-care skill development ngaih pawimawh a ṭul a, Jordan Centre pawh thiamthil an zir nghalna hmuna siam a ṭha," a ti a, Social Welfare department hotute chu hma la nghal turin a hrilh.

Chief Minister chuan, TNT leh kohhranin an enkawl de-addiction centre-te pawhin skill development programme an kalpui theih dawn chuan a ṭul angin sorkarin ṭanpuina (grant-in-aid) pek a inhuam thu a sawi a; SWD minister Lalrinpuii chuan hma a lak nghal tur thu a sawi.

Ṭawngṭai Bethel Camping Centre chungchangah Lalrinpuii chuan, ṬBCC hotute chu sorkar kaihhruaina hnuaiah an enkawl zawh tâwk la tur leh, mumal zawka kohhran leh khawtlang hruaitute nen thawkho chunga an kal dan tur a sawipui tur thu a sawi bawk.

Inkawmnaa tarlan danin, Mizoramah ruihhlo ngaite enkawlna integrated rehabilitation centre for addicts (IRCAS) 11 tihlenna tur leh IRCAS la awm lohna district panga - Saitual, Khawzawl, Hnahthial, Lawngtlai leh Mamit-ahte din a nih theih nan Ministry of Tribal Affairs-ah puihna (funding) zawn mek a ni.