AMVCA-in VC lawmman tihpun an duh thu CM hnenah an thlen

All Mizoram Village Council Association (AMVCA) hruaitute chuan May 16, 2025-a chief minister Lalduhoma a pisaa an hmuhnaah VC member-te lawmman tihpun ṭha an tih thu an thlen.

AMVCA hruaitute'n VC-te lawmman tihpun ṭul an tih thu an thlen chungchangah hian Chief Minister chuan, tunah tih nghal rum rum theih ni lo mah se, VC-te lawmman chungchang chu a hriatthiampui a, a theih ang anga hmalakpui zel a tum thu a sawi.

Mizoram sorkarin VC dan thar a pawm ta chu lawmawm an tih thu AMVCA hruaitute chuan sawiin, a taka hman vat a nih theih nan chak taka hma la turin Chief Minister an ngen a; CM Lalduhoma chuan a changtu LAD Minister be nghalin, chak taka bawhzui turin a chah a ni.

AMVCA hruaitute chuan Mizoram House-ah VC member-te thlen manah con-cession siam a nih theih nan leh Aizawlah VC-te tan khualbûk siam a nih theih nan hma lakpui turin an ngen a; Chief Minister chuan Aizawla VC house tur hmunhma ngaihtuaha hmalak zel a nih tur thu a sawi.

Finance Commission aṭanga VC-te hnathawh tur chungchang te, fûrpuiah mipuite'n harsatna an tawh lutuk loh nan Mizoram kawngpui hrang hrangah hmalak vat a ṭul thute an thlen bawk a; CM Lalduhoma chuan chak taka a lo bawhzui tur thu a lo hrilh tih ZPM thuchhuah chuan a tarlang.