Saiphai khawtlangin kawng an siam

Saiphai panna kawngpui, Phainuam leh Saiphai inkar NH-306A chu a chhiat lutuk tawh avangin Food, Civil Supplies & Consumer Affairs (FCSCA) department-in ration buhfai pek kawngah harsatna an tâwk ṭhin a, hei vang hian May 17, Inrinni khan khawtlangin an thawm ṭha.

Phainuam-Saiphai kawngpui chu siam thuai a nih loh chuan ration an dawng lo thei mai dawna an hriat avangin Saiphai VC bultumin kawng siam hnatlang koh a ni a; PWD-in JCB thawhin, VC-in lung thiarna tur lirthei an thawh a, mipuite'n kawng chhe zual laiah lung an hnawh/phah a ni.

Phainuam-Saiphai inkar kawng hi kum 2017 khan siam a ni a, chumi hnuah thawm ṭhat a ni leh tawh lo. Kawngpui hi Mizoram PWD enkawl a ni a, short term maintenance thawk turin company kuta dah ni mah se, company lamin an ngaihsak tâwk lo.

Phainuam khawtlang hruaitute'n thil awm dan PWD Minister hnena an thlen hnuah PWD chuan tun hnai khan kawng khuar leh chhia hnawhna tur lung an dah a ni.