ZPM LC-te tan training buatsaih

ZPM party chuan May 16, 2025 khan Republic Veng YMA Hall-ah ZPM aṭanga Aizawla local council member atana thlan tlinte tan political training an buatsaih a, minister pahnih K Sapdanga leh B Lalchhanzova ten an hmanpui.

K Sapdanga chuan, ZPM local council member ṭhenkhat chu politics huang la dai ngai lo, zei lo tak tak an nih thu sawiin, "Kohhran leh NGO-a kan hruaitu, khawtlang leh ram tana theihtawp chhuah ṭhinte in ni a, in tawnhriatte kan ram leh khawtlang hmasawn nan hmang chhunzawm zel turin ka ngen che u. Ṭhenkhatte chu LC vawi tam tak lo ni tawhte pawh in awm," a ti.

Thawhhona ṭha nei turin kalphung thar zia keng chunga kal a pawimawh tih sawiin Sapdanga chuan, "Ram rorelnaa Pathian ram tun din hi kan tum a ni. ZPM LC ni mai loin, mipui ta kan ni tih hi kan hriat reng a pawimawh. Kan CM-in kan sorkar tirh aṭangin mut kham ní ka la nei lo a tih hi ka pawm khawp mai, file-in zan a riak tur a ni lo a tih vangin kan thawk rim em em a ni," a ti a; ZPM sorkarah chuan an thawk rim a, an hlim bawk thu a sawi.

Minister of state B Lalchhanzova pawhin thu sawiin, LC member-te chu ram rawngbawltu pawimawh, kilkhawr ber thlenga mipuite dinhmun hre chiang bertu an nih thu a sawi a, "Sorkar hmasate kan thlir chuan eng nge an lo tih le tih mai a awl ṭhin khawp mai. Pathian leh mipui zarah Chief Minister kaihhruaina hnuaiah sorkar ṭha tak kan siam ta a, ZPM leh kalphung thar hi ṭhen hran theih a ni lo a, khawtlang hmasawnna turin dik tak leh huaisen taka hma la turin ka chah che u a ni," a ti.

Thil ṭha tih tuipui tlat tura LC member-te chahin B Lalchhanzova chuan, "Mipuite'n he sorkar zar hi an zo ang a, min thlang nawn leh ngei ang tih hi ka rin dan a ni. Bial tinah MLA aṭanga block, unit thlengin thawhhona ṭha kan neih a pawimawh a, thawhona ṭha nei tur pawhin LC-te in pawimawh," a ti a; theihtawp chhuah zel tur leh minister-te an kal sual theihna tura nawr lui lo turin a chah.