Minister, kohhran leh NGO hruaitute'n ruihhlo ngai enkawl dan tur an sawiho

Social Welfare minister Lalrinpuii chuan May 16, 2025 khan Secretariat conference hall-ah kohhran leh pawl hrang hrang hruaitute a kâwm a; ruihhlo ngaite enkawlna chungchang sawipuiin, ruihhlo ngai enkawlnate sorkara an inziah luh vek a ṭul thu a sawi.

Lalrinpuii chuan, The Mizoram Drug (Controlled Substance) Act, 2016 leh The Mizoram Drug Treatment cum Rehabilitation Center Accreditation Rules, 2019 angin ruihhlo ngai enkawlna home/centre zawng zawngte sorkara an inziah luh vek a ṭul thu leh, inziak lutte chu sorkarin puih a tum thu a sawi a ni.

Inkawmhonaah hian Central YMA, MUP, Mizoram Kohhran Hruaitute Committee (MKHC) leh Council of Churches in Mizoram (CCM) aiawhte an tel a; Social Welfare Minister chuan, ruihhlo ngaite enkawlna leh ruihhlo ti lo tura invenna lamah anmahni zawn ṭheuha ṭan la turin a ngen.

Sawihonaah, ruihhlo hluar zel leh ruihhlo ngai pung zel chu an ngaimawh thu an sawi a, nasa lehzuala hmalak ṭul an tih thu te, ruihhlo ngai enkawl dam chu thil harsa tak a nih avangin Pathian thu leh kohhran behchhana kal a ṭul thute sawi a ni a; invenna lamah kohhrante'n nasa zawkin inzirtirna kalpui se an ti.