Advertisement tel loin hna nghet lak a ni ngai tawh lo - Dy Speaker

Assembly deputy speaker Lalfam­kima, Kolasib bialtu MLA chuan, ZPM sorkarah chuan advertisement tel loin hna nghet lak a nih loh thu leh, hna ṭha hmu turin thiamna a pawimawh ber thu a sawi.

Lalfamkima hian May 16, 2025 khan Kolasib College-ah Mizoram Youth Commission (MYC) Coaching Session May-August a hawng a; thu sawiin, "Sorkar tharah chuan advertisement tel loin hna nghet chi rêng rêng lak a ni ngai tawh lo a, hna ṭha hmu tur chuan thiamna a pawimawh ber a ni," a ti.

Tunlaiah inelna a nasat tawh thu sawiin Lalfamkima chuan, "Ṭhalaite awm mai mai loh tur a ni a, hna zawng mek in nih chuan tih tak zet leh taima takin hma lam pan u la, mahni intuai hriam te, mahni inrintawkna leh thiamna tak takte neih a ngai tawh a ni," a ti a; zirlaite chu an tum ram thleng tura MYC Coaching Session hmang ṭangkai turin a fuih.

MYC Coaching Session hawnnaah hian Kolasib College principal Lalṭanpuia Rengsi leh faculty-te bakah, Kolasib MYC Coaching Session-a kal mek zirlaite an tel a; zirlai 14 an awm mek. Kolasib bialtu MLA hian MYC Coaching Centre-a kal duh, admission fee-a harsatna nei mi panga chu admission fee a tumsak a ni.