KHAWTHLIR

Bus pahnih pe

Indian Oil Corporation chuan an corporate social responsibility (CSR) aṭangin May 16, 2025 khan Gilead Special School, Bawngkawn hnenah bus pahnih an pe. Bus inhlanna hun hi Mizoram CSR Cell chairman TBC Lalvenchhunga, MLA-in a hmanpui.

Sports fund sem

Aizawl District Sports Committee chairman Lalhriatpuia, district bawrhsap chuan May 16, 2025 khan DC Pisapui Hall-ah sports promotional fund a sem. Infiamna tihhmasawnna tur sum hi infiamna pawl 11 hnenah Rs 25,000 ṭheuh pek a ni.

Heroin man

Hnahthiala Excise & Narcotics mite chuan May 17, Inrinni khan New Ngharchhipah Lalhmingtluanga (47) s/o Kaphranga (L), New Ngharchhip hnen aṭangin heroin (no. 4) hawng 10 (gram 115) an man a, nimin khan Lunglei District Court-ah an hruai. Heroin an man hi Rs 3,50,000 hûa chhût a ni.

CM-in Lungleng a tlawh

Chief minister Lalduhoma chuan May 17, Inrinni khan Lungleng khua a tlawh a; Bethel Ministry-in Human Development Centre din an tumna hmun a en bakah, khawtlang hruaitute nen an inkâwm. Chief Minister hi minister Lalrinpuii leh bialtu MLA Baryl Vanneihsangi ten an ṭawiawm a; Lungleng ramah Mizo Territorial Army Batallion Headquarters hmun tur remchang a awm dawn em leh awm loh an thlithlai thu sorkar thuchhuahin a tarlang.

HSSLC pass lawmna hmanpui

Minister PC Vanlalruata chuan May 17, Inrinni khan a bial Tuikum chhunga Tlungvel Higher Secondary School-ah HSSLC 2025-a zirlai pass tharte lawmpuina hun a hmanpui a, zirlai 25 hnenah lawmpuina pawisa leh lehkhabu a pe. PC Vanlalruata chuan, Tlungvel HSS aṭanga HSSLC 2025-a zirlai hlawhtlingte chu kawng thui tak zawh tur an la neih avangin inbuatsaih turin a chah a; zirlai hlawhtling rih lote pawh beidawng lo turin a chah bawk.