MYC-in Incentive Cash Award a sem

Dy. CM chuan, all India service, medical, technical, central civil service, defence leh huang dangahte Mizo ṭhalai tam zawk an luh theihna turin sorkarin theihtawp a chhuah chhunzawm dawn tih a sawi a, "Nakkum lamah chuan Incentive Cash Award sang ber Rs. 2,00,000 dawng thei turin ṭhalaite'n all India service main exam-ah inziak tling ngei turin chona an hmachhawn a ngai a ni," a ti.

MYC chairman Dr Vanlalṭanpuia, MLA chuan, Chief Minister ṭhahnem­ngaihna avangin SEDP hnuaiah ṭhalai lehkhathiamte chhawmdawlna tur sum ruahman a ni tih a sawi. Dr Vanlalṭanpuia chuan, MYC hnuai­ah UPSC, IIT(JEE), NEET, CAT, Staff Selection Commission, banking, IELTS leh hna ṭhenkhat exam inpuahchah nan coaching kalpui mek a nih thu te, army pre-recruitment coaching kalpui a nih thute a sawi a; "Kum 2014 aṭang khan Mizo zingah IAS-a inziak tling an awm tawh lo a, hei hi sorkarin a vei hle. Hun rei lo têah Delhi khawpuia coa­ching centre ṭha ber berah Mizote kan zirtir dawn a ni," a ti.

SEDP hnuaia Incentive Cash Award sem hi category II, III, IV leh V siam a ni a, special assistance award siam a ni bawk. Award-in sum a ken tel dan chu - Category-II ah Rs. 1,00,000, Category-III ah Rs. 50,000, Category-IV ah Rs. 40,000, Category-V ah Rs. 30,000 leh Special Assistance-ah Rs. 50,000 a ni. Category-I atan Rs. 2,00,000 ruahman a ni a, hei erawh hi chu central service exam (main)-a tlingte dawn tur a nih avangin dawng thei an awm lo.

Nimina Incentive Cash Award semah hian Rs. 70,00,000 sem a ni a, mi 147-in an dawng a ni.