Sorkar damdawi-in 5-in NQAS hmu thar

State Referral Hospital leh primary health centre (PHC) pali - Chhipphir PHC, Phuldungsei PHC, West Phaileng PHC leh Bilkhawthlir PHC te chu India rama sorkar damdawi-in ṭha tehna, National Quality Assurance Standards (NQAS)-ah an tling thar.

National Health Mission (NHM) mission director Dr Lily Chhakchhuak tarlan danin, NQAS hnuaia endiktute chuan March 21&22, 2025 khan Mizorama sorkar damdawi-in ṭhenkhatte an endik a; damdawi-in panga chu NQAS an tling thar a ni.

Heti hian Mizorama sorkar damdawi-in 19-in NQAS national certificate an nei tawh a; tunah hian sorkar damdawi-in 24 dangin state certificate nei tawhin, national certificate an dil mek bawk.

NQAS tehnaah State Referral Hospital (ZMCH) chuan 92.89% a hmu. Damdawi-in pum pui anga NQAS certification an hmuh bakah hian, nau neihna hmun ṭha bik tehna (LaQshya)-ah platinum certificate an hmu a; Maternity Operation Theatre-ah 98.26%, labour room (nau neihna)-ah 92.88% leh naupang enkawlna bikah 92.80% an hmu.

NQAS tehnaah hian Chhipphir PHC-in 92.48%, Phuldungsei PHC-in 91.27%, West Phaileng PHC-in 89.47% leh Bilkhawthlir PHC-in 94.94% an hmu bawk.

Health minister Lalrinpuii chuan, State Referral Hospital (ZMCH) leh PHC paliin NQAS certi­fication an hmu thar chu a lawmpui thu a tarlang a, "Damdawi-in ṭha bik thlan zingah Mizorama damdawi-in an awm belh zel hi Mizoram tan méllung pawimawh tak a ni a, thawktu zawng zawng­te thawhrimna leh taimakna a chhuanawm. Heng tehnate hi sorkar damdawi-in pantu dam­lote chu a chhawr ṭangkai bertu tur an ni," a ti.