Hna lakah a thiam leh tlingte chauh kan la zel dawn - CM

Chief minister Lalduhoma chuan nimin khan ZPM pisaa chhung inkhawmah thu sawiin, ZPM kaihhruai sorkar hnuaia hnathawh rêng rêng a ṭha tur a nih thu leh, sorkar hna laknaah a thiam leh tlingte chauh an lak zel dawn thu a sawi.

Lalduhoma chuan, ZPM sorkar hnuaia hnathawh rêng rêng a ṭha tur a ni tih sawiin, "Mipuiin beiseina sang tak nen min thlir a ni tih hriain, contract hna a ni emaw, MLA fund hmanga hnathawh rêng rêng kalphung thar mipui sorkar hnuaiah chuan a ṭha bik tur a ni. Hna endiktu tur party hrang hrangte awmna Mizoram State Project Monitoring Committee kan din a, anni hian rim takin an thawk mek a, hna ṭha lote chu a ṭul anga action lak a ni a, kan la zel dawn bawk," a ti.

Sorkar hna thawk tur lak chungchangah Chief Minister chuan, "Sorkar hna lak chung­changah a thiam leh tlingte chauh kan la zel dawn," a ti a; ṭhalaite chu taima taka lehkha zir tur leh thiam­na tak tak neia ram tana mi chhenfâkawm ni tur­in a chah.

CM Lalduhoma chuan, ram rorelnaa Pathian ram tun din tumtu party an nih thu sawiin, tlang hrang hranga an lungrualpuite chu rilru thianghlim leh ram hmangaihna thinlung chhawm nung zel turin a chah a, "Keini party lo hi Zoram mipuite hian innghahna an nei tawh lo, mahni hmun ṭheuhah ṭhahnemngai taka ram tana thawk zel turin ka chah a ni,” a ti.

Mizoram mipuiin ZPM sorkarah rinna leh beiseina thar an nei nia sawiin Lalduhoma chuan, "Lawmawm ka ti a, hei hian chakna min pe ṭhin. Famkim lo ni mah ila, kei leh ka thawhpuite nen theihtawp chhuahin kan ram tan châwl loin hna kan thawk mek a ni," a ti a; Mizoramin hmasawnna hmel thar a hmu chhoh mek avangin an lawm thu a sawi.