May 23 ral hmaa kawng siam truck neitu leh khalhtute'n phût

Mizoram Truck Owners Association (MTOA) leh Mizoram Truck Drivers Association (MTDA) chuan Buichali leh Sairang inkar NH kawngpui chhe zual laite May 23, 2025 thlenga siam a nih loh chuan truck-te dintir an tum.

MTOA leh MTDA chuan thuchhuah siamin, May 16, 2025 khan Buichali-Sairang inkar kawng chhe lutuk chungchang an sawiho tih an tarlang a, "Truck a tlûk tâk nual avangin a chhe zual hmun thum hmun li tal hi hnawh hram turin thuneitute kan ngen a ni," an ti.

May 23, 2025 thlenga kutthlak a nih loh chuan bungraw phur truck an tlan ngam tawh dawn lo tih tarlangin MTOA leh MTDA chuan, eibâr leh ni tin mamawh a lo buai ta deuh a nih pawhin mipui hriatthiamna an dil a ni.