Ṭanpuina dawngtu kut hnathawktute an inenfiah a ṭul - Agriculture Minister

Agriculture & Farmers’ Welfare minister PC Vanlalruata chuan, loneitute leh agriculture hmasawnna tura hmalakna hrang hrangah chhunzawm loh leh hlawhtling zo lo a awm ṭhin chu pawi a tih thu sawiin, ṭanpuina dawngtu kut hnathawktute an inenfiah a ṭul thu a sawi.

Agriculture department chuan nimin khan an directorate committee room-ah an hmalaknate leh hmachhawpte an thlirho a; minister PC Vanlalruata'n hmanpuiin, an department chu Mizoram mipui mit fûkna a nih avangin deparment pawimawh tak a nih thu a sawi a, "Agriculture hmasawnna atana hmalakna hrang hrang chhunzawm loh leh hlawhtling zo lo a awm ṭhin hi pawi hle a, sorkara hruaitu te, department-a thawkte leh ṭanpuina dawng ṭhin loneitute thlengin he thilah hian kan inenfiah tlan a ngai," a ti.

PC Vanlalruata chuan, loneitute hmasawnna tura sorkar hmalakna zinga fuh tâwk lo a awm ṭhin thu sawiin, "Chu'ng fuh tâwk lote chu siamṭhat zel tum a ni," a ti a; Agriculture officer-te chu an hna chanpual ṭheuhte tikhawtlai loa a rang thei ang bera hma la nghal zel tur leh loneitute hmasawnna atan ngaihtuahna sêng zel turin a chah.

Agriculture secretary Ramdinliani pawhin thu sawiin, "Agriculture department hi department upa leh hlun a ni a, hmalakna tam tak kan neih ṭhinte hi kimchang taka dahṭhat (documentation) ṭhin ni se," a ti a; department dangte nen thawhho a ṭul thu leh ṭhangtharte’n thlai enkawl an tuipui ve theih nan ṭhalaite tiphûr thei zawnga thlai enkawl dante ngaihtuah a ṭul thu a sawi bawk.