Doctor leh nurse puala zirhona ṭan a ni

Mizoram Health System Strengthening Project (MHSSP) chuan nimin khan Civil Hospital, Aizawl conference hall-ah primary health centre (PHC)-a thawk doctor leh nurse te tan Clinical Knowledge & Skill Improvement Workshop an buatsaih ṭan a, May 22, 2025 thleng neih a ni ang.

Zirhona hawn inkhawm hmanpuitu National Health Mission (NHM) mission director Dr Lily Chhakchhuak chuan, sorkar laipuiin Sample Registration Report (SRS) a tihchhuah thar berah kum khat chhunga nau chunga nu thi zat tehnaah ram pum chawh rual 20 a nih laiin, Mizoram chu 9 chauh a nih thu a sawi a, "Nausen thi zat chu 4% niin, Manipur leh Sikkim nen ram pumah a hniam ber kan ni," a ti.

Dr Lily Chhakchhuak chuan, nu leh nausen enkawlnaah Mizoram chu ram puma a ti ṭha ber pawl ni mah se, tun hnaia nau chunga nu thi awm zingah sepsis kaihnawih an awm nual avangin workshop buatsaih a nih thu a sawi a; "Doctor leh nurse ten CKSI mobile apps aṭanga an zirte a taka an thiam leh zualna atana buatsaih ṭhin a ni a, an hlawkpui hle ṭhin," tiin, an thil zirte chhawr ṭangkai ngei turin PHC doctor leh nurse te a chah.

Tun ṭuma Clinical Knowledge & Skill Improvement Workshop hi vawi ngana a ni a, nu nau hrin chungchang leh nau piang hlim chungchanga harsatna chi hrang hrangte inzirtir a ni a; thil pawimawhte zirtir turin Bhagwan Mahaveer Jain Hospital, Bengaluru aṭangin Dr Prakash Mehta, Dr Shreya Kamath leh Dr Prasanna te an tel.

Workshop-ah hian nimin leh vawiinah doctor-te an tel (dawn) a; May 21 & 22-ah nurse-te an tel thung ang.