MSU hruaitute'n Larsap an kâwm

Mizo Students’ Union (MSU) Gen.Hqrs hruaitute chuan nimin khan Governor Gen. Vijay Kumar Singh chu Raj Bhavan-ah an kâwm a, zirlai kaihhnawih thil chi hrang hrang thlenin, hma lakpui turin an ngen.

MSU hruaitute chuan, Commun University Entrance Test (CUET) 2025-ah Mizo zirlai eng emaw zat Mizoram pawna exam tura tih an nih thu sawiin, zirlaite tan harsatna a awm theih thu an thlen a; Mizoram chhungah an exam theih nan hmalakpui turin Larsap an ngen a ni.

Hemi chungchangah hian National Testing Agency Director General hnena lehkha an thawn tawh chu bawhzuisak turin Governor an ngen a; Prime Minister hnena an lehkha thehluh pawh bawhzuisak turin an ngen bawk.

Governor chuan, MSU ngenna chu a bawhzui tur thu a lo hrilh a; Eklavya Model Residential School(EMRS), Kendriya Vidyalaya leh Sainik School-ah te Mizo zirlai tam zawk lut se ṭha a tih thu leh, ruihhlo donaah ṭan nasat a ngaih thu leh thawhhona ṭha a pawimawh thu sawiin, theihtawp chhuah turin MSU hruaitute a chah.