Mipui harsat lutuk lohna tur ngaihtuah chunga hmalak kan tum - Chief Minister

CM Zoramthanga chuan, Mizorama Covid-19 kai awmchhunin ṭhat lam a pan tih sawiin, "Kan lawm a, vannei kan inti a ni. Chawlhkar eng emaw zat kan inkhârkhip ta a, chuvangin, páwn lam aṭanga natna vei an awm a nih loh chuan keimahni hi chu ziaawm thawkhat turah kan inngai. Amaherawhchu, hriat loh aṭanga lo thleng thei a nih avangin fi mkhur erawh a ngai," a ti. Mipui tana harsatna lutuk thlen palh theih a nih thu sawiin CM chuan, "Ram dang aṭanga natna lo luhna tur theihtawpa veng chungin, mipui harsat lutuk lohna tur ngaihtuah bawkin tunah chuan hmalak kan tum," a ti a; inkhàrkhip kalpui dan tur chu State Level Task Force-in uluk taka an duan thu a sawi. Zoramthanga chuan, ṭhen  awm state leh ramahte Covid-19 kai leh thi eng emaw zat an awm thu sawiin, "Hengte hi uluk taka kan vên fi mkhur a ngai a, hetah hian tuna kan insàwrbingna tur leh kan chakna kan pekna tur ber pawh a ni," a ti.

Chief Minister chuan, local task force leh tlawmngai pawlte hahzia sorkarin a hria a, lawma wm an tih thu sawiin, "Police, paramilitary force, Assam Rifl es, BSF-te leh puitu dang reng reng tih tak zetin lawmthu kan han hrilh nawn leh a ni," a ti a; kohhran hruaitute kaihhruaina hnuaiah Mizoram ṭawngṭaina Pathianin a chháng nia an hriat thu a sawi.

Covid-19 a kian hnua nunphung pangngaia kal hunah Mizoramin ei leh bar leh thil dangah harsatna lutuk a tawh loh nan tun aṭangin theihtawp i chhuah ang u.

• Hmarchhak state-a tangkhangte motor-in lak luh mai theih turah kan ngai a, mahse, a hnua sokar laipui lockdown order puanah state kaltlanga inphurh khap a ni.

• Mipuite'n lo leh huan lama hna thawh an chhunzawm theihna turin task force-te nen inremsiamna neiin, he lamah hi chuan kan inthlahdul dawn.

• Ṭhál hun a tàwp lek lek tawh avang leh a hun lai tak a nih avangin fimkhur takin kawng siam leh lei dawh hna kalpui a ni dawn

. • Mistiri-te'n anmahni workshopah mi pung khawm luai luai loin hna an thawk char char thei tho a, phalsak an ni ang. In sakte pawh mi pungkhawm tam loa chhunzawm remchang task force-te enpuina hnuaiah a rem turah kan ngai.

• Bungraw phur motor khalhtute leh motor-a thawkte natna an rawn la lut lo a ni tih hriat nan uluk taka lo check a, screen vek bakah, Mizoram chhunga an awmnaah mi dangte nen inchawhpawlh loa an unload zawh veleha haw leh vang vang turin, Mizoramah chámbáng rei hauh lo turin instruction pek an ni.

• Essential commodity kan tih zinga chhiar tel ni lo mah se, kan hnathawhna, kan ram development hna thawhna pawimawh zual atan thir, cement leh thil dang in sakna atan te, kawng siamna atante leh thil dang pawimawh zual ṭul tak takte lak luh pawh phal a ni dawn