Ṭhalaite'n eizawnna tlak thiamna an neihna tur bul ṭanna CM leh Union MoS-in an hawng

India hmarchhak state ṭhalaite’n eizawnna tlak thiamna chi hrang hrang an neih theihna tura a bik taka hmalakna atana bul ṭanna, 'Pilot Initiative for Special Intervention for Promotion of Appren­ticeship in North Eastern Region (NER)' chu nimin khan ATI Auditorium-ah chief minister Lalduhoma leh sorkar laipuia Skill Development and Entrepreneurship minister of state Jayant Chaudhary ten an hawng.

CM Lalduhoma chuan, Union Minister rawn zin chuan Mizoramin them­thiamna tihhmasawn (skill development) leh kutkawih eizawnna (entrpreneurship) lama hmalakna nasa taka a chawh phûr a rin thu a sawi a, "Mizoram mipui 60% chu ṭhalai kum 35 hnuai lam an ni a, kaihhruaina ṭha leh dik nena hmalak a nih chuan Mizoram mai ni lo, India ram economy ṭhan zelna atan kan thawh hlawk thei hle dawn a ni," a ti.

Jayant Chaudhary chuan, India hmarchhakah thiamna (talent) a awm a, ṭhalaite'n theihna (potential) sang tak an nei tih sorkar laipuiin a hriat thu sawiin, "Data kan neih aṭangtea kan han en hian India hmarchhaka ṭhalaite theihna hi a nih tur angin kan la cho chhuak lo tih kan hria a, a bika hmalak a ṭula kan hriat avangin bul ṭanna atan ‘pilot initiative’ kan la a, Prime Minister pawhin a ngai pawimawh hle a ni," a ti a, PM hoin review meeting neih ṭhin a nih tur thu a sawi.

Pilot Initiative for Special Intervention for Promotion of Apprenticeship in NER tlangzarhnaah hian UDPA minister K Sapdanga, LESDE minister Lalnghinglova Hmar leh Nagaland MLA Moatoshi Lungkumer te pawh an tel.

National Skill Development Corpo­ration leh Welspun Living Limited ten textile sector-a hmarchhak ṭhalai 1,000 thiam thil zirtir bakah, hna an hmuh sakna tura inremna an ziahna an inhlan a ni.

Pilot Initiative for Special Intervention for Promotion of Appren-ticeship in NER hi PrM Narendra Modi duhthusam 'Viksit Bharat, Viksit Northeast' tihhlawhtlinna atana hmalakna pawimawh tak ni tura beisei a ni a, he programme hmang hian hmarchhak state pariata industrial training institute (ITI) 109 tihchangtlun a ni dawn.

Hmarchhak state-a Micro, Small and Medium Enterprises (MSME)-te'n trade hrang hranga an mamawh ang zat ṭhalai hna thiam tak chhawr tur an neih bakah, hmarchhak piah lama thawn chhuah tur ṭhalai thiamna bik nei tam tak chher chhuah tum a ni.

Special Intervention kaltlangin ITI-ah zirlai an pun beisei niin, trade/sector hrang hrangah hmalak tum a ni a, a ṭul anga dah belh a ni ang. Hmalakna hi hmarchhak ṭhalai, anmahni state ni lo hmarchhak state dang emaw, hmarchhak pawn lam state dangah emaw zir duh mi 26,000 velin an chhawr beisei a ni a, chumi atan chuan cheng vbc. 43.94 ruahman a ni. ITI-a zir tura thlante chu thla tin stipend pek tur awm sa Rs 1,500 bakah Rs 1,500 dang PM-NAPS kaltlangin an zir chhung zawng pek belh a ni dawn.

Apprenticeship leh Traditional cluster chungchanga mipui zirtirna atana hmalakna turin cheng vbc. 4 dah turin ruahman a ni a, Indian Institute of Entrepreneurship (IIE), Guwahati leh National Skill Development Corporation (NSDC) ten hma an la dawn a, IIE Director kaihhruaina hnuaiah monitoring committee din a ni bawk ang.