Aizawla tui lakna thar hawn a ni

Public Health Engineer-ing (PHE) minister Prof. Lalnilawma chuan nimin khan Muallungthuah NESIDS-OTRI hnuaia hma­lakna, 'Alternate Gravity Water Supply Scheme of Aizawl' (AGWSSA) a hawng a; tuihna humhalh kawngah ṭhan­harh zel a ṭul thu a sawi.

Prof. Lalnilawma chuan, kum 2018-2025 chhunga sorkarna siamtu political party pathum leh PHE department-a thawktute ṭhahnemngaihna leh inpekna vanga AGWSSA hlawhtlinna hmuh a ni ta chu a lawm thu a sawi a, "Khawl leh kawl­phetha rin ngai loa awihtlân beh­chhana tui lak khawl leh sem theih tura ruahmanna hian inrenchemna kawngah nasa takin hmasawnna a thlen ngei ka beisei," a ti.

Tui chu khawtlang hrisel nan leh hmasawn nana thil pawimawh berte zinga mi a nih thu sawiin Lalnilawma chuan, "Tui hi ram leilung hausakna mi tin inṭâwm a nih angin tui renchem kan inzirtir a pawimawh a, tuihna humhalh kawngah kan ṭhanharh zel a pawimawh," a ti a; ram leilung hausakna humhalh chunga hmasawnna inbûk tâwk kalpui thiam a ṭul thu a sawi.

Aizawl South-III bialtu MLA Baryl Vanneihsangi Tlau pawhin thu sawiin, AGWSSA hmalakna a hlawhtlin theihna tura sûlsutu leh hma latu department-a thawktute leh a hmun petu Muallungthu khawtlang inpekna fakawm a tih thu a sawi.