Kum 2024-2025 chhungin HIV vei Lunglei dist-ah 130, Siaha dist-ah 155

Sorkar kum liam ta 2024-25 chhungin HIV vei Lunglei district-ah mi 130 hmuh chhuah a ni a, Siaha district-ah mi 155 hmuh chhuah a ni.

Mizoram State AIDS Control Society (MSACS) project director Dr Jane R Ralte hoa Lunglei District AIDS Prevention and Control Committee (DAPCC) hotute May 19, Thawhṭannia an ṭhutykhawmnaa tarlan danin, April 2024 - March 2025 chhung khan Lunglei district-ah thisen endik 8,258 aṭangin HIV vei mi 130 hmuh chhuah a ni.

Mi nawlpui (general client) zingah thisen endik 6,373 aṭangin HIV+ve mi 123 hmuh chhuah a ni a, endik zat aṭangin 1.93% a ni. Nu nau pai bik 1,885 endik aṭangin HIV vei mi pasarih hmuh chhuah an ni bawk.

General client zinga HIV+ve hmuh chhuah 123 zinga mi 84 (68.29%) chu mipat hmeichhiatna hman aṭanga kai an ni a; hriau thianghlim lo inhman ṭâwm aṭanga kai mi 38 leh kaina chin hriat loh mi pakhat an awm.

Lunglei district-ah hian kum 2008 aṭanga March 2025 thlengin HIV vei mi 2,156 hmuh chhuah a ni tawh a, chung zinga mi 446 chu an thi tawh a ni.

Siaha District AIDS Prevention and Control Committee (DAPCC) pawh nimin khan an chairman VL Hruaizela Khiangte, bawrhsap leh MSACS Project Director hoin an ṭhukhawm a; kum 2024-25 chhungin thisen 2,203 endik zinga 155-in HIV an vei tih hmuh a nih thu tarlan a ni.

Kum 2024-25 chhunga Siaha district-a HIV vei hmuh chhuah zat 155 hi thisen endik zat aṭangin 7.04% a tling. Thisen endik zinga 952 chu nu nau pai an ni a, nau pai zinga mi pasarih (0.74%) chu HIV+ve an ni tih hmuh chhuah a ni.

Siaha district-a HIV positive hmuh chhuah mi 155 zinga 71.6% chu inchiuna hriau inhman ṭâwm vanga kai an ni a, mipat hmeichhiatna aṭanga kai 26.45% an awm. National AIDS Control Organization (NACO)-in HIV Estimation Data a tibchhuahah Siaha district hi priority list-ah a tel.

Dr Jane R Ralte chuan, Mizorama HIV/AIDS hluar zel chu Mizoram mipui harsatna a nih thu sawiin, "Prevalence rate (HIV hluar dan)-ah kan sang fâl nalh hi ngaimawh a ṭul tak zet," a ti a; khawtlang hruaitute chu mipat hmeichhiatna hman fimkhur a ṭul thu leh hriau inṭâwm a pawizia tlangaupui turin a sawm a, condom sem kawngah an thawhpuina a ngen bawk.