KHAWTHLIR

Bethlehem Vengthlang Branch YMA chuan AVBD leh Blood Bank ngenna chhángin nimin khan Aizawl Civil Hospital-ah thisen unit 44 an pe a, petute mipa 36 leh hmeichhia pariat an ni. Individual donor pakhat a awm bawk. Serchhip College NSS unit pawhin nimin khan Serchhip District Hospitalah thisen unit 20 an pe a, petute hmeichhia 11 leh mipa pakua an ni.

Covid-19 Task group on Commodities chu an chairman HL Rochungnunga, FCSCA commissioner hoin nimin khan a pisaah an ṭhu a,  inkharkhip chhunga Mizoram mipui ei leh bar buhfai leh ni tin mamawh dang te, gas leh tuialhthei lak luh leh sem dan tur an sawiho. State páwn aṭanga Vairengte thlenga rawn phurh luh dan tur leh, load dang la leh tura lirthei leh a khalhtute inbànleh dan tur an duang a ni. 

Nimin khan tlai dar 3 thlengin Chief Minister's Relief Fund-ah Covid-19 donaa hmalakna atan Rs. 3,22,500 chhûn luh a ni. Pawisa petute chu - Aizawl Municipal Corporation Rs.1,70,000, Mizoram Polytechnic, Lunglei Rs. 1,00,000, Tuikhuahthlang Local Task Force Rs. 40,000, Aizawl Hrangkhawl Welfare Rs. 10,000 leh Tipa Express, editor T Rosiama Rs. 2,500-te an ni. 

Champhai Ṭhalai Pawl (CṬP) hruaitute chuan a ṭum hnihna atan nimin khan Myanmar ramri hnai - Zote, Tlangsam leh Ngúr khuaa local task force duty-te an tlawh a, chini, bawnghnute, thingpuife, thosi hlo leh Rs. 2,000 ṭheuh an pe. 

 Kolasib district-a Harley Owners Group-in Rs. 50,000, St John's Class X of 1987-in Rs. 34,000 leh Timothy Lalchhuanawma te chhungkuain Rs. 50,000 an thawhte chu YMA Sub-Headquarters, Kolasib chuan ramri hrúla duty task force hrang hrangte hnenah an hlân. Sum an hlan hi a vaiin Rs. 1,34,000 a ni.

Lawngtlai district chhunga Myanmar ramri hnaiha awm, Archhuang kai checkpost-a police duty commander Hav. F Lalthansanga, 2nd MAP, Lunglei, Lunglawn chu nimin zing dar 8:30-ah a thi. Sangau aṭanga thu dawn danin, police thih chhan hi Covid-19 nen a inkaihhnawih loh thu doctor-te chuan an sawi. A ruang hi Lawngtlai East bialtu MLA H Biakzaua chuan a buaipui nghal a ni.