Khawpui 2-ah 100 Days TB Campaign hawng

Assembly deputy speaker Lalfamkima, Kolasib bialtu MLA chuan nimin khan Kolasib Circuit House-ah sorkar laipui bultuma ngawr (TB) ûm bo beihpui thlakna, 100 Days Campaign - Nikshay Shivir a hawng a, Nikshay Shivir campaign lirtheite a vailiam. Campaign hi Lawngtlaiah pawh nimin khan adviser to CM Dr Lorrain Lalpekliana Chinzah-in a hawng.

Lalfamkima chuan, TB chu a damdawi hmuh chhuah tawh a nih avangin enkawl dam theih a nih thu a sawi a, "Inkai chhàwn erawh la awlsam tak a ni. Mizo khawtlangah a huhoa thil ti chi kan nih avangin TB leh natna dang pawh mi pakhatin a vei chuan mi dang tan vei vena remchang a tam a, fimkhur kan mamawh," a ti.

Sorkarin mipui hriselna a ngaih pawimawh thu sawiin Lalfamkima chuan, "Mizoram Universal Health Care Scheme kaltlangin Mizoram mai ni lo, ram pawn thlenga an refer dana azira inenkawlna a awm theih dawn avangin mi harsa tak takte'n an chhawr ṭangkai lehzual hle dawn a ni," a ti a; MUHCS-ah inziak lut ṭheuh turin mi tin a sâwm.

Tarlan danin, December 2024 aṭang khan 100 Days Campaign hi India rama high priority district 347-ah ṭan a ni a; Mizoramah pawh Aizawl, Champhai, Serchhip leh Mamit district-ahte kalpui a ni tawh. Kolasib-a kalpui tur hi ṭhuang hnih - Kolasib khaw chhung leh pawnah ṭhen a ni a; Kolasib khaw pawn lamah hand held x-ray hman tum niin, vawiin hian Phaisenah ṭan a ni ang.

100 Days Campaign hi Lawngtlaiah pawh nimin zing khan Chandmary Square-ah Lawngtlai East bialtu MLA Dr Lorrain Lalpekliana'n a hawng a; World Health Organization-in kum 2030-ah khawvel aṭangin TB ûm bo a tum thu sawiin, "India ramah chuan kum 2025-ah ûm bo turin campaign kalpui mek a ni a, chutih rualin, hmachhawp a la tam hle," a ti a; theihtawp chhuah turin thawktute a chah.

Lawngtlaia deputy chief medical officer leh district TB officer Dr Remlalnghaki'n National TB Elimination Programme kalphung leh 100 Days TB Campaign thil tumte a sawifiah a; TB veite chak taka rang taka hmuh chhuah leh enkawlna ṭha pek chu hna hmasa a nih thu a sawi.