Hmeichhe zirlai ti ṭhate chawimawi; Mipa innghahna tlak an tlem tawh - Rinpuii

Women & Child Development (WCD) hnuaia State Hub for Empowerment of Women (SHEW) chuan nimin khan IPR Lianchhiari Rûnah kumin HSLC leh HSSLC-a top 10-a tling hmeichhiate lawmpuina hun an hmang a; Social Welfare, Women & Child Development (SWWCD) minister Lalrinpuii'n hmanpuiin, mipa rintlak leh innghahna tlak an tlem tawh thu a sawi.

Minister Lalrinpuii chuan, hmeichhia nih vanga indah hniam emaw, thil tih harsat bik riau tura inngaihna nei lo turin zirlai hmeichhiate a chah a, "Tunlai kan Mizoram khawtlangah mipain hma an sawn a pawimawh hle a, mipa rintlak leh innghahtlakna an tlem tawh. Mipa fa enkawl danah nu leh pate'n ṭan kan lak a ṭul hle," a ti.

HSLC leh HSSLC top 10-a lang zirlai hmeichhiate chu an kal zelnaah mi dangte nun tidanglam thei tura zirna thiltihtheihna tilangtu ni tura chahin Minister chuan, "Tuna in hlawhtlinna hi a bul ṭanna a ni tih hre reng rawh u. Hlawhtlinna tam zawk leh dinhmun sang zawk la luah chho tur chuan thâ thlah loa rinawm taka in beih a ṭul dawn," a ti a, theihtawp chhuah zel turin a chah.

Social Welfare Minister hian kumin HSLC leh HSSLC-a top 10-a lang zirlai hmeichhia 30 hnenah lawmpuina leh chawimawina atan pawisa leh thuchei a hlan. Kumin hian HSLC top 10-ah hmeichhia 10 leh HSSLC top 10-ah Arts-ah hmeichhia pakua, Science-ah hmeichhia paruk leh Commerce-ah hmeichhia panga an tel a ni.

Chawimawina inkhawm hi SWWCM joint secretary Zonunthari'n a kaihruai a, WCD director Zoramthangi Chhangte leh joint director Zonunpari Sailo te pawhin thu an sawi.

Hmeichhe naupang zirna lam leh infiamna lama thiam bikte chawimawina hun hi Beti Bachao Beti Padhao (BBBP) kaltlangin kum tin neih ṭhin a ni a; BBBP-in a tum ber chu 'Save the girl child, educate the girl child' (Hmeichhe naupang chhanhim la, zirtirna ṭha pe rawh) tih a ni.