Larsapin sikul din champha a hmanpui

Governor Gen. Dr Vijay Kumar Singh chuan nimin khan bengngawngte zirna sikul, Ephatha Special School din champha vawi 9-na lawmna a hmanpui a; vohbik naupangte enkawlnaah inchhung khura inenkawlnain awmzia thui tak a neih thu a sawi.

Larsap Gen. VK Singh chuan, "Vohbik naupangte enkawlnaah inchhung khura inenkawlnain awmzia thui tak a nei a, hmangaihna leh an laka beiseina sang tak chuan naupangte chakna a pe a, harsatnate paltlangin duhthusam an thleng thei ṭhin," a ti a; nu leh pate chu an fate'n zirna ṭha an dawn theih nana theihtawp chhuah turin a chah.

Sorkarin mi tin huapzo zirna a kalpui mekah zirna tibahlah thei thil a awm loh nan hmalak a nih thu sawiin Governor chuan, "Ephatha Special School hmalakna hi mi tin huapzo zirna a taka tichiangtu a ni. Thawktute inpekna leh rawngbawlna ka chhuang hle a ni," a ti a; an din chhan tihlawhtling turin a theihna zawn apiangah puih a inhuam thu a sawi.

Inkhawmah hian Ephatha Society of Mizoram president Saihmingthangi, principal Samuel R Lalhmangaiha, senior adviser Laldikkimi, adviser Lalbuatsaiha leh general secretary Jenny Lalbiaktlingi te pawhin thu an sawi a; Larsap hian zirtirtu kal ṭha lawmman a sem.

Ephatha Special School for the Deaf and Hard of Hearing hi May 11, 2016-ah din a ni a, principal pakhat hoin zirtirtu panga, craft teacher pakhat leh volunteer pakhatte'n zirlai 24 an enkawl mek. Pawl 1-8 thleng zirna a awm a, Indian Sign Language hmangin zirna kalpui a ni.