Minister-in zirlai ti ṭhate laptop a hlân

Minister C Lalsawivunga chuan nimin khan a pisaah a bial Aizawl South-I huam chhunga HSSLC 2025-a top 10-a tlingte chawimawina hun a buatsaih a, lawmpui nan laptop a hlan.

C Lalsawivunga chuan, MLA a nih tirh aṭanga tun thlengin ṭhalaite'n central service-a luh duhna thinlung an put theih nan theihtawpa a au ṭhin thu a sawi a, "Kan ṭhalaite an ṭhanharh a ṭul ta hle a, MPSC mai ni lo UPSC thlenga inziak tling thei tura rilru kan siam a ngai tak zet tawh. Kan ram leh hnam tan a ni tih hriain zirlaite'n central service lam hawi se ka duh hle a ni," a ti.

Nu leh pate chawimawi a ṭul thu sawiin C Lalsawivunga chuan, "Nu leh pa chawimawi hi thil dang vak a ni lo, nun kawng dik zawh a, mahni kawng ṭheuha hlawhtlinna chang khawpa Pathian hre reng chunga ke pên hi nu leh pa chawimawina kawng pawimawh a ni," a ti a; zirlaite chu ruihlo leh sualna dang laka inveng tlat tura chahin, Pathian rin chhan chunga hlawhtlinna chang zel turin duhsakna a hlan.

Aizawl South-I bialtu MLA-in lawmpuina a hlante chu HSSLC 2025 Commerce-a pakhatna Kristin Laldinpuii Ralte, College Veng; Science-a pasarihna Lalmuankimi, Republic Vengthlang leh Commerce-a pasarihna Juliet VL Hriatzuali, Bethlehem Veng te an ni.