Sawhthing sâwngbàwl dan zirho a ni; Sorkar flagship programme tihhlawhtlinna kawngah pass mark kan hmu - Adviser to CM

Mizoram Agricultural Marketing Board (MAMB)-in sawhthing sawngbawl tura a thlan firm/mimal ten tan nimin khan CDAR, Tuiriala Ginger Processing Centre-ah buatsaih a ni. Zirhona hmanpuitu adviser to CM (Handholding) Dr KC Lalmalsawmzauva chuan, sorkarin flagship programme a tihhlawhtlinna kawngah 'pass mark' an hmuh thu a sawi.

Dr KC Lalmalsawmzauva chuan, "Kan flagship programme tihhlawhtlin kawngah pass mark kan hmu. Thlai thlan bik zingah hmarcha chu sorkar buaipui lutuk ngai loin farmer-te'n an hralh zo thei a, Mizo buh kan lei tawh. Aieng quintal 400 kan lei a, kan la lei belh mek. Hmunphiah pawh harsatna tlem tawk deuh mah ila, tunah chuan support price period chhunga thar chu kan lei zo thawkhat tawh," a ti.

Tun thlengin sawhthing quintal 1,14,622.82 an lei tawh thu sawiin Adviser to CM chuan, "Sawhthingah duhthusamin kal thei chiah lo mah ila, Mizoram history kan siam tawh. Kan sawhthing tharte state dang leh ram dangah Mizoram an hriat theih nan Mizo brand siam a ni dawn a, a packaging material-ah MAMB logo telh zel turin kan duh," a ti a, chuvang chuan Mizo sawhthing thar chuan belhchian a dâwl tur a ni tih a sawi.

Sawhthing sâwngbàwl dan zirhonaah hian SAMETI Post Harvest Technology-a faculty Vanlalramchhani Chhangte-in sawhthing zai lêp dan leh tihro dan a zirtir a; Brightflame Food & Agriculture-a mi Omkar-in sawhthing ro hralh dan kalphung a sawifiah. CDAR-a mi Lalawmpuii hoin practical training neih a ni bawk.

Adviser to CM Dr KC Lalmalsawmzauva hi nimin vek khan Delhi leh Jharkhand aṭanga sawhthing sawngbawltu company hotute nen an inkâwm nghal a; Mizorama ginger processing plant din dan tur leh kut hnathawktute dâwm kânna tur Central policy-te an sawiho a ni.