KHAWTHLIR

Minister-in tlawh

May 19, Thawhṭanni zan khan Excise & Narcotics minister Lalnghinglova Hmar chuan Synod Revival Committee-in ruihhlo ngaite puala Chhanchhuahna Camping a buatsaihna hmun Youth Recreation Centre a tlawh a, camper-te nen inkawmhona hun an hmang. Lalnghinglova Hmar chuan, ruihhlo ngaite veia camping buatsaihtute fakawm a tih thu a sawi a, "Camper-te ṭha taka an rawn chhuah vek ka beisei a, thinlung takin duhsakna ka hlan a ni," a ti.

Police-in heroin man

Lunglei police-te chuan nimin chawhma lam khan Dâwn khaw daiah Rohluzuala (37) s/o Lalthanzauva, Theiriat hnen aṭangin heroin (no. 4) gram 193.02 an man.

Inven dan sawiho

Serchhip DC Paul L Khuma kaihhruaiin nimin khan sorkar hotute leh Serchhip district chhunga national kighway kawngpui siamtu contractor pathumte'n fûr laia kawng siam vanga harsatna thleng theite ven dan tur an sawiho. Leimin leh chhiatna nasa zawk a thlen lohna turin a hmunhma enho ni se, hmalak chhunzawm dan tur ngaihtuah leh ni se, an ti.

Helmet him ṭha khum turin hriattir

Lunglei SP J Lalmuankima chuan hriattirna tichhuakin, two wheeler khalhtute chu helmet (protective headgear) him leh rintlak, ISI mark chuang emaw, Bureau of Indian Standards (BIS)-in a pawm chin leh a tlukpui chauh khum turin a hriattir. Satel helmet khum phal a nih loh thu leh dan bawhchhiate chu pawisa chawitir bakah, driving licence hrênsak thlenga hrem theih an nih thu a tarlang.

Vawk 5,450 thi tawh

Vawk pùl hri, African Swine Fever (ASF) vangin kuminah Lunglei, Siaha, Lawngtlai leh Mamit district-a khua/veng 54-ah nimin thleng khan vawk 5,450 a thi tawh a; vawk thi zinga 1,244 hi hri darh zel tur ven nana suat niin, a bâk 4,206 chu hri vanga thi an ni. Siaha district-a khua/veng 29-ah hri vanga thi 2,439 leh suat 777 awm tawhin a tam ber.