Kawng siamthatna tur sum a tlem Theihtawpin hma kan la dawn - PWD

Public Work Department (PWD) hotute chuan Inrinni khan Aizawl Press Club-ah thuthar thehdarhtute an kâwm a; kawngpui a ṭhat theihna atan theihtawpin hma an lak zel tur thu sawiin, "Kawng siamṭhatna tur sum kan neih tlem avangin harsatna kan tâwk," an ti.

PWD engineer-in-chief R Vanlaltluanga chuan, kawng ṭha neih dawn chuan kawng chhiat hunlai a awm lo thei lo tih sawiin, "Kawng laih a nih a, fûr ruahtui tam laia lirthei chi hrang hrangin an zawh reng chuan kawng a ṭha reng thei lo. Hmun hrang hrangah kawng siam zawh a nih hma chuan harsatna eng emaw a la awm zel ang," a ti a; siam a nih chhunga kawng a chhe deuh a nih pawhin hrethiam turin mipuite a ngen.

PWD-in theihtawpin hma an la reng dawn tih sawiin R Vanlaltluanga chuan, "Leimin leh kawng ping a awm reng rengin PWD-a thawktute'n a thim a vár thlu lo leh a sûr a sa pawh pawisa loa an thenfai zel avangin rei tak kawng block a ni ngai lo tih hi mipuite'n min hriatsak ve se kan duh hle," a ti.

R Vanlaltluanga chuan kuminah fur a rei avangin kawng siam lamah harsatna an tawh thu sawiin, "Fur a zo ṭan a, theihtawpin hna kan thawk dawn a ni," a ti a, hnathawk ṭan turin ruahmanna an siam sa vek tawh thu a sawi.

PWD E-in-C sawi danin, kumina lirnghingin lei a tithâwl a, ruahtui a tam bawk avangin kawng min a tam phaha hriat a ni.

PWD hotute chuan, PWD-in Mizoram kawng a enkawlte siam ṭhatna atan kumin sorkar kum chhungin cheng vbc. 36.7 an neih thu an sawi a, "Kan pawisa neih hmang hian km. khat Rs. 1,80,00 zela thawm ṭhat theih ang a ni. Planning Commission ṭhiah a nih tak avangin state sorkarin sum an ruahman bak pawisa a awm theih tawh loh avangin sum kan nei tam lo," an ti.

National Highway chhiatah mawhphurhna an nei tam lo tih sawiin PWD hotute chuan, "Sorkar laipuiin sum engkim a ruahman vek a, keini chuan NH atan pawisa kan nei lo. Kawng neitu sorkar laipui lamin pawisa min pek loh chuan kan tan siamṭhat ngaihna a awm lo," an ti a; NH siam a nih theih nan sorkar laipui an nawr nasa ṭhin niin an sawi.

PWD hotute sawi danin, Mizoram kawng chhiat zual bikna chu a tlangpuiin national highway a ni a, PWD chu a enkawl tura sorkar laipuiin an rawih a ni.

Rangvamuala leimin ṭhin tihreh a nih theihna atana Disaster Management & Rehabilitation department aṭanga cheng nuai 100 chuang an hmanna zawhna chhangin PWD chief engineer (Highways) John Rammawia chuan, leivûng paihna atan sum hman a nih thu a sawi a, "Keini chuan hnathawh kan vil a, pawisa pek chhuah erawh kan kut a ni lo," a ti.

Hetih lai hian PWD Superintending Engineer pakhat chuan, Rangvamual leimin thenfaina atana an sum hman chu an department kaltlanga tih vek a nih thu press conference-ah vêk hian a sawi thung.

Lunglei-Tlabung kawng chungchanga zawhna chhangin PWD chief engineer (roads) K Lalsawmvela chuan, kawng chu BRO-in kum 30 chuang an enkawl hnuah PWD kutah kum 1999-ah an hlan tih a sawi a, "Maintenance fund a awm loh avangin PWD-in a enkawl hnuah major repair a la awm lo a, hmun ṭhenkhat lai thawm ṭhat zeuh zeuh erawh a awm. Sum awm loh vangin kan enkawl ṭha zo lo," a ti.

PWD SE Lalruata sawi danin, Lunglei-Tlabung kawng hi kum 20 chuang blacktoping tih lohin a awm tawh. Kum 2014-ah NH-ah puan a ni a, kum 2015-16 ah sorkar laipuiin package-I, km. 0-30 siam nan sum a pe a; a siamtu tur contractor chu EL&TY Enterprise (PC Lalthantluanga) niin, work order amount chu cheng nuai 1370 a ni.

PWD hotute hian Chhûmkhûm-Chawngte kawng km. 41.53-a thui te, Aizawl-Mamit kawng siam mek leh KDZKT kawng siam mek chungchangte pawh an sawifiah a, harsatna hrang hrang awm mah se, siam-
ṭha turin theihtawp an chhuah tih an tarlang.