Bru thil phût thar zingah tihhlawh-tlin theih loh tur a awm: Home Minister
Home minister R Lalzirliana chuan, Tripura-a awm mek, Mizoram Bru-te chu Mizoramah an rawn kîr ngei a beisei thu a sawui rualin, tun hnaia Mizoram Bru Displaced People Forum-in sorkar laipui leh state sorkara thil phût an siam thar zingah tihhlawhtlin theih loh tur a awm nual thu a sawi.
Thuthar thehdarhtute zawhna chhangin R Lalzirliana chuan, Bru-te chu anmahni duh thua Tripura-a chhuk an ni tih a sawi a, "Mizoram sorkar leh mipuite'n eng lai mahin an do ngai lo," a ti.
Mizorama hruai kîr tum an nihnaah Mizo nula leh tlangvalte fakawm a tih thu sawiin, "Mizote'n an zinga mi tumah an la that lo a, anmahni zawkin Mizo eng emaw zat an that tawh chunga YMA leh zirlai pawlte'n lawmna thu nena an lo hmuak theite hi Mizo rilru dik tak niin ka hria," a ti.
Home Minister chuan, tun hnaia MBDPF-in sorkar laipui leh state sorkara thil phût thar sawiin, "Chhung tin hnena ram hectare nga ṭheuh pek an phût hi tihhlawhtlin theih a ni lo. Bru lo kîr turte hi chhungkaw ṭhahnem tak an nih avangin hetiang zat ram pek tur hi sorkarin a nei lo hrim hrim," a ti a; ram pek tur awm pawh ni se, V/C thuneihna a nih angin, V/C-in ram a ṭheh hunah lo number pawtin an nei ve mai tur niin a sawi.
Mizorama rawn lêt Bru-te chu Mizoram an chhuahsan hmaa an awmna district-ah dah an ni vek dawn tih sawiin, R Lalzirliana chuan, "An awmna tur pawh district tin DC-te kaihhruainain a khaw neitute'n an endik vek tawh," a ti.
Home Minister sawi danin, Bru-te hruai kîr an nih hmaa an awmna tur endik an phût leh hruai kîr an nih laia khaw tina an aiawh mi pahnih dah an phût chungchangah tun hnaiah MHA aṭangin MBDPF duh anga ti tura hriattirna Mizoram sorkarin a dawng. R Lalzirliana chuan, Mizoram chu state puitling a nih angin, UT anga sorkar laipuiin a duh ang anga a rah hrual tur a ni lo a, an duh dan dana an rawn thunun chu state sorkarin a phal dawn lo tih a sawi.
Minister Lalzirliana chuan, MBDPF hruaitute'n an awmna tur an fang kual duh a nih chuan Mizoram sorkarin a hnial hran lo tih sawiin, "District tina DC-te kaihhruainain an fang kual ang a, police venhimna an phût erawh chu, Mizoram hi state ralmuang ber a nih angin a ṭulna a awm lo. Sorkar thuneitute zingah Governor leh Chief Minister chauh vên an nih laia anni venhimna pek chu thil theih a ni lo," a ti.
Kum 2009-a Bru chhungkaw 613 Tripura-a chhukte Final Repatriation Plan-a telh an phût pawh MHA thuneihna a nih thu a sawi bawk.
Bru hruai kîr dan tur buaipui tura din State Level Core Committee on Bru Repatriation chuan Movement Plan a duang a; Movement Plan anga Bru lâk lêt tura chhinchhiah chu chhungkaw 3,455 niin, mi 20,700 chuang an ni.