KHAWTHLIR

Thisen pe

Inrinni khan Chaltlang Branch KṬP chuan an din champha lawm nan Aizawl Civil Hospital tan thisen unit 52 an pe a, a petute mipa 45 leh hmeichhia pasarih an ni. Tuikhuahtlang Branch KṬP-in Synod Hospital tan thisen unit 36 an pe a, a petute mipa 30 leh hmeichhia paruk an ni. Lunglei Zotlang Bial ṬKP-in Lunglei Civil Hospital tan unit 35 pein, a petute mipa 21 leh hmeichhia 14 an ni a; Wesleyan Youth Fellowship, Champhai-in Champhai District Hospital-ah unit 12 an pe a, a petute mipa 10 leh hmeichhia pahnih an ni.

LIKBK khawmpui

Lairam Isua Krista Baptist Kohhran (LIKBK) chuan, October 20, 2016 zan aṭang khan pastor bial hrang hrangah bial inkhawmpui an hmang a, nizan khan a ṭiak. Inkhawmpuiah hian bial hrang hrangte hian Zirtawpni chhun khan ro an rêl a; kohhran pui, ṭhalai pawl, hmeichhe pawl leh mipa pawlte'n anmahni khawih ṭheuh an ngaihtuah a ni.

Tui tla hmu

October 20, 2016 tlai dar 3 vela Tlawng luia tla hlum, PC Zothansanga (31) s/o PC Vanlalsawma, Chawlhhmun, Aizawl ruang chu October 22 chawhma dar 10 vel khan hmuh a ni. PC Zothansanga zawng hian October 21 leh 22 khan mi ṭhahnem tak an thawk chhuan a, a tlakna aṭanga hla vak loah a ruang hmuh a ni.

Car hnâwl thi leh

October 15, 2016 zana SUV car MZ-01 M-8604 in Maubuang Damdiai-a mi pali a hnâwl zinga mi, Jonathan Hmingthantluanga (thla hnih) s/o Rebecca Lalbiakkimi chu October 22, 2016 tlai dar 3:10 khan New Life Hospital-ah a thi. Lalremruata (26) s/o F Lalchamliana, Bungkawn khalh motor-in a hnâwl zan hian Zopari w/o Remthanga, Damdiai a thi tawh bawk.

MNF din champha

MNF party chuan October 22, 2016 khan Mizoram hmun hrang hrangah MNF din champha vawi 55-na an hmang. MNF din champha hi unit hrang hrangah hman a ni a, inkhawm leh ṭawngṭai rualna hunte an hmang a ni.

Medical camp

Lunglei district-a Health & Family Welfare department bultumin Inrinni khan Haulawng khuaah free medical camp buatsaih a ni a, mi 400 hriselna dinhmun endik niin, a thlawna damdawi pek nghal a ni.