MTA-in Yoga laka fimkhur turin an chah
Mizo Theological Association (MTA) chuan thuchhuah siamin, Yoga chu Hindu zirtirna lairil anga rilru leh suangtuahna sâwrbingna nen ṭhen theih loha kal kawp a ni tih an tarlang a; Mizo Kristiante'n Yoga tel loin rilru leh taksa sawizawina ṭha dang an ngah tâwk avangin Yoga hmang ve kher lo turin an ngen.
MTA chuan, Yoga chu taksa leh rilru hah tihdam nan leh damna kim channa tura taksa leh rilru sâwizawina ang leh Mizoramah pawh taksa sawi-zawina a nihna chin chu Kristiante tan a pawi lo anga sawi ni mah se, "Yoga chu Hindu zirtirna lairil (philosophy) anga rilru leh suangtuahna sâwrbingna nen ṭhen theih miah lohin a kal kawp a, chu chu Yoga ti-Yoga tu a ni a, a tel lo chuan Yoga a ni lo," an ti a; Hindu ni loin yogi (Yoga hmangtu/chhawrtu/nunpuitu) a nih theih loh tih an sawi.
Yoga chungchanga tun hnaia sorkar laipui hmalakna chu thil ṭha tak anga lang hmanga Hindu sakhua leh culture thehdarh tumna nia a lan thu sawiin, MTA chuan Mizo Kristiante fimkhur turin an chah a, "Hindu ni lo chuan yoga hmangtu (yogi) dik tak a nih theih loh a, Mizo Kristiante chuan Yoga tel lo hian rilru leh taksa sawizawina ṭha dang kan ngah tâwk a, Yoga hman ve kher a ṭul lo," an ti.
Zu chungchangah MTA chuan, Mizo lehkhathiam
ṭhenkhatin zu khap bur aia zu in dân ṭha inzirtir a ṭhat zawk an rin thu an thehdarh ṭhin nia sawiin, "Kohhrante erawh chuan Bible ṭan chhanin uar takin zu zawrh duh lohna an au chhuahpui thung," an ti.
MTA chuan, zu zawrh leh zawrh loh chungchanga boruak insual kárah sorkarin zu zawrh phalna dan a siam tih sawiin, "Zu phalrainain thihna leh nun buaina chi hrang hrang a thlen nasat avangin kohhran, khaw-tlang leh chhungkua a tichî-âi nasa ta hle," an ti a; zu chu mimal, chhungkua, khawtlang leh kohhran nun tichhetu a nih avangin zalên taka zawrh chi ni loa an ngaih thu an tarlang.
MTA chuan, Mizo ṭhalaite zingah hamṭhatna zawnga India leh ram páwna chhuak an awm ve nual tawh a, ti fuh deuhte pawh an awm tih an sawi a, "Mahse, nun phung leh khawsak dan inthlâk vang te, a ruaitute'n rin loh lama sal ang deuha an chhawr vanga khuahkhirhna hrênga táng, nun buai vnga mahni intihlum hialte an awm," an ti a; Mizo ṭhalai vâk chhuak tam takte nun a him vak lo niin an sawi.
Hnam dangte pawh ham-
ṭhatna zawngin Mizoramah an pém lût nasa hle tih sawiin, MTA chuan, "Sorkarin a en zui ṭhat loh avangin sumdawnna, sakhua, vantlang leh mimal nun hriat thiam harsa khawpin a nghawng buai tawh niin a lang. Hnam dang nau pai, pasal ûm leh kawng tinrénga hnam/sakhaw dang lungrualpui thei, Mizo nun leh nihna bosal ta hialte an pung," an ti. Mizoram
aṭanga pèm chhuah leh Mizorama pèm luh chungchang chu Mizo mipui leh kohhrante’n an vei a hun tak zet tawha an hriat thu an sawi.