Haulawngah model village hawn a ni

Lok Sabha MP CL Ruala'n model village atana a thlan thar, Haulawng khuaah Inrinni khan model village hawnna inkhawm buatsaih a ni a, Lok Sabha MP leh bialtu MLA PC Lalthanliana, minister ten an hmanpui.

MP CL Ruala chuan, Haulawng khua chu khaw inlungrual, V/C ṭangrual leh hna thawk thei a nia sawiin, "Mi dangte tana entawn tlak ni turin ka duh che u. Model village atan sum hranpa dah a nih loh avangin a hming mai a ni lo'm ni tih a awl a. India hnam pa Mahatma Gandhi khan khaw hrisel, thianghlim leh intodelh a mitthla ṭhin a, chutiang khua chu siam kan tum a ni," a ti.

Neitu rilru púa hna thawh loh chuan, hna thawhnaah hlawhfa anga inngaihna a piang thei tih sawiin Lok Sabha MP chuan, "Neitu rilru put loh chuan kan hnathawhte a dawráwm ṭhin," a ti a; hlawhtling tur chuan rilru lama inbuatsaih a pawimawh thu a sawi.

CL Ruala hian Hau-lawng khaw hnenah tui dahkhawlna tur siamna atan cheng nuai 15 a pe nghal a ni.

Minister PC Lalthanliana pawhin thu sawiin, Haulawng khua model village atana thlan a ni chu lawmawm a tih thu a sawi a, "Pawl rilru kan tihbo a, kan zavaia tan a ni tih hriat a pawimawh. Sorkarin a tih tur a tih bakah mipui leh khaw-tlangin faina leh thianghlim kawngah theih ang tawka hma kan lak ve a ṭul," a ti.

Inkhawmah hian Haulawng V/C president KH Ṭialthanga’n an khaw chanchin a sawi a; Haulawng Village Day-ah October 21 a puang nghal a ni.