Bru-te an awmnaah endik dawn
Mizoram Bru ráltlânte Tripura aṭanga hruai kir dan tur sawihoin, October 21, 2016 khan Tripura-a Kanchanpur dâk bangla-ah Mizoram sorkar leh Tripura sorkar official-te leh Mizoram Bru Displaced People Forum (MBDPF) hruaitute an ṭhukhawm. Bru-te hruai kir hmaa an awmnaa endik hmasak tura ruahmanna awm sa chu an pawm.
Meeting-ah hian, Tripura relief camp-a awm Bru, Mizorama lâk lêt turte chu endik phawt tura ruahmanna awm sa chu an pawm a, ruahmanna hi Ministry of Home Affairs pawhin a pawm tawh a ni. Camp hrang hrang parukah Mizoram aṭanga endiktu tur, identification team-te'n zing dar 9:30 aṭangin endik hna an thawk ṭhin ang.
Mizoram leh Tripura sorkar aiawhte chuan, Bru repatriation kaihhnawiha hriat tur pawimawh leh intelligence thilah inpawh taka thil pawimawhte inhrilh ṭhin turin an inti a, lungrual taka thawhho ni se, an ti.
Meeting-a an rel danin, Bru lak let hna thawk tura Mizoram aṭanga kalte chu Tripura state chhungah chuan venhimna kawngah Tripura sorkarin a ṭul ang buaipui turin an rél a; Bru endik hna chu November 1, 2016-ah ṭanin, Mizorama hruai kir hna chu November thla tawp lamah ṭan hman tum a ni.
Sorkar thuchhuah tarlan danin, Bru camp-a awmte chu Mizoram electoral roll 1995 hmanga endik tur a ni a, electoral roll-a hming chuang lote chu ṭhuang hnihnaah endik leh an ni ang. Mizorama kîr tawh, chhawmdawlna leh ṭanpuina dawng tawhte chu dawn nawntir an ni dawn lo.
Meeting-ah hian MBDPF hruai-tute chuan, Mizorama hruai kîr an nih hmain an thil phût hrang hrangte tihhlawhtlinsak an phût thu an sawi. Sorkar hotute erawh chuan, Ministry of Home Affairs thuchhuak leh Road Map anga kalpui a nih avangin, MHA lam thu ngaihchân a ngaih thu leh, an thil duhte chu MHA-a thlensak an tum thu an hrilh.
Meeting-ah hian Mizoram sorkar aṭangin Home additional secretary Lalbiakzama, Mamit DC Lalbiaksangi, Mamit addl. DC H Lianzela, Kolasib addl. DC R Lalremsanga, Lunglei addl DC JH Lalrimawia leh Kolasib SDC Lalrinawma
Khiangte te an tel. Tripura sorkar
aṭangin North Tripura DC, Panisagar SDM leh Kanchanpur SDM an tel a, MBDPF president A Sawibung-a leh hruaitu dangte an tel bawk.