India ramah Kristian tan Chanchinṭha hrilna kawng a ping hnai - MPC President

MPC president Lalhmangaiha Sailo chuan nimin khan MPC ṭhalai office bearer-te ṭhutkhawmnaah thu sawiin, BJP sorkar thil tih dan avangin India ramah Kristiante tan Chanchinṭha hrilhna kawng a ping hnai niin a sawi.

Lalhmangaiha Sailo chuan, BJP kaihhruai sorkar laipuiin CAA an kalpui mek laia an agenda dang lian ber chu Anti Conversion Bill a nih thu a sawi a, "Draft bill pawh an peih vek tawh. He Bill hi Parliament-ah an pawm leh chuan, tumah sakhua thlak phal a ni thei tawh dawn lo. Kristiante tan phei chuan ‘Setana Bill’ tih loh rual lohin Chanchinṭha India ramah kan hril thei tawh dawn lo a ni. Chutih hunah chuan kan MP neih chhun hian an party remtihnain a bán a phar leh mai ang em?" a ti.

MPC President chuan, RSS ho agenda-ah chuan, kum 2021-ah India ramah Muslim leh Kristian awm tawh lo tura hmalak a ni tih sawiin, "Hindu rashtra (Hindutva) Hindu sakhua kaihhruaina ram, India ram pum chu ni turin hma nasa takin an la char char tih hi i hre thar leh ang u," a ti a; Mizo mipuite chuan hnamah an chian theih loh pawhin, Hindu lalram tun din tuma hmalaknaah tal chiang turin a chah. Congress leh MNF sorkar chungchangah Lalhmangaiha Sailo chuan, "Congress leh MNF party-te'n kum 40 rorelna an inchelh chhâwk chhungin MIP, VAFFACOS, NLUP-te an hmang a, CAG-in heng programme-te hi a fail vek, a tihte kha a ni," a ti.