State páwna tangkhang mi 2,576

Sorkarin Mizoram páwna Mizo tangkhangte buaipui tura a din Task Group on Migrant Workers & Stranded Travellers chhinchhiah danin, inkhârkhip kalpui mekah Mizoram páwna awm/tangkhang mek mi 2,576 an awm a; Mizoram pawn lam mi Mizorama tangkhang mek mi 2,886 an awm bawk.

Sorkar thuchhuah tarlan danin, Task Group on Migrant Workers & Stranded Travellers hian Mizoram chhunga tangkhangte leh state páwna Mizoram khua leh tui awmte an buaipui a; tun dinhmunah state páwnah Mizoram mi 2,576 an awm a, chu'ng zingah chuan ram dang (India ram pawn)-a tangkhang mi 185 an tel.

Hetih lai hian, Mizoram chhungah ram dang mi tangkhang mek mi 47 an awm mek a, India ram state dang mi, hna thawk leh zin veivak Mizorama tangkhang leh awm mek mi 2,839 an awm thung. Sorkar laipui ruahmanna angin Mizoram sorkar chuan Mizorama tangkhangte chu a ṭul angin task force hrang hrang te, kohhran leh tlawmngai pawlte nen ṭanghoin an buaipui a ni. State páwna Mizo awmte pawh Mizoram Chief Secretary chuan an awmna state chief secretary ṭheuhte hnenah a ṭul anga buaipui turin lehkha a thawn ṭhin a; state ṭhenkhat chuan hma la tawhin, Mizoram mi leh sa tangkhangte chu an lo buaipui a, ei leh in turte an lo pe a ni.

Hriat theih chinah Uttar Pradesh, Andhra Pradesh, Madhya Pradesh, Karnataka, Punjab leh Kerala sorkarte chuan an state-a Mizo awm leh tangkhangte an buaipui tawh. Mizoram sorkar chuan Mizote ṭanpuina lo petu state sorkarte chungah lawmthu a sawi a; state/khawpuia Mizo welfare, Mizo sorkar hnathawk leh company-a thawk leh NGO-te inpeknaah lawmthu a sawi bawk. Mizoram chhung leh páwna tangkhang inhriattir duh tan online-in 'tangkhang.mizoram. gov.in' ah leh Task Group on Migrant Workers & Stranded Travellers member-te hnenah inhriattir zel theih a ni.