APRIL 20-AH VANGLAINI SEM CHHUNZAWM TUM

 Covid-19 hri lêng avanga Vanglaini chanchinbu  print chhuah loha PDF copy chauh siama rei tak kalpui a nih hnuah, April 20,2020 aṭangin chanchinbu pangngaia chhut leh tawh tura ruahmanna siam a ni. Covid-19 hri lêng avanga chanchinbu semtuten harsatna an tawh avang leh, Aizawl khaw pawna a sem chhuahna kawngah harsatna a awm bawk avangin Vanglaini chanchinbu chhut hi March 22, 2020 aṭanga tihtawp a ni. State Level Task Force for Covid-19 tun hnaia ṭhukhawm chuan chanchinbu semte chu hna chhunzawm thei tur zinga a telh angin, harsatna dang a awm loh chuan Vanglaini pawh sem chhuah leh theih kan tum. Aizawl khawpuiah bul ṭan phawt a ni ang a, chanchinbu phurtu lirtheite an kal leh theih hunah Aizawl pawn lamah pawh sem chhuah a ni ang. Aizawl Khawpuia Local Level Task Force on Covid-19 zawng zawngte chanchinbu semtute harsatna tawh theihte min venpui a, tluang taka sem a nih theihna tura kawng min kawhhmuh turin kan ngen tak meuh che u a ni. Aizawl khaw pawn lama subscriber-te tán Vanglaini PDF copy hi hun eng emaw chhung tihchhuah a la ni dâwn a, Vanglaini website www.vanglaini.org, Vanglaini Facebook page-te nen a rualin chawhma dár 11:00-ah tihchhuah ṭhin a ni ang. - Editor, Vanglaini