CEO-in Delhi-ah ECI hotute a kâwm

Chief electoral officer (CEO) Dr Lalrozama leh joint CEO Ethel Rothangpuii te chuan nimin khan Election Commission of India-a deputy election commissioner Madhup Vyas eh hotu dangte an pisaah a kâwm. Madhup Vyas hi Mizoram chief electoral officer kal chhuak ta a ni.

CEO Dr Lalrozama hian Mizoram Election department-in harsatna a neihte leh hmasawn ngaihna laite ECI hotute hnenah a thlen. District hrang hranga electronic voting machine (EVM) dahṭhatna warehouse thawm ṭhat a ngaih thu leh ECI duh dan anga warehouse himna atan venghimtu tam zawk dah belh turin Police hotute ngen an nih thu a sawi.

Mizoram CEO hian Election department-a thawktu indaih lohna sukiang tura hmachhawp te, Election department-in building hran a neih loh vanga harsatna a tawh te, building hranpa neih lohin inthlan laiin venhimna thlenga nghawng a neih theih dan leh a rang lama building hran neih a ṭul dante a thlen. Mizoramah media a la changtlun tâwk loh avangin ECI hmalakna hrang hrang puanzarnaah harsatna a awm ṭhin niin a sawi a ni.

ECI hotute chuan, Mizorama inthlanah Mizoram People’s Forum (MPF)-te'n inthlanna thianghlim a awm theihna tura hma an laknate chu ṭha an tih thu an sawi a; Mizoram chu state ralmuang a nih angin, state dangte entawn tlak khawpa inthlanna felfai neih a nih ṭhin avangin Mizo mipui chungah an lawm thu an sawi bawk.

'One nation, one election' kalpui turin ECI a inbuatsaih thu sawiin ECI hotute chuan, sorkar laipui hmalakna hi a hlawhtlin theih nan thláwp tur leh hma lakpui turin Mizoram CEO leh Election department-a thawkte an sawm a ni.