Biological Diversity Day hman a ni

Nimin May 22 kha International Day for Biological Diversity a ni a, Mizoram hmun hrang hrangah hman a ni. Aizawlah chuan Mizoram State Biodiversity Board leh National Biodiversity Authority (NBA) bultumin ATI Auditorium-ah hman a ni a, Environment, Forest & Climate Changte (EFCC) minister Lalthansanga'n a hmanpui.

EFCC Minister chuan, ram hmasawnna leh thilnung chi tinrengte humhalhna chu kal kawp tlat tur a nih thu a sawi a, "Nungcha venhim hna hi kan tihmakmawh a nih vanga thawk tur kan ni lo a, kan hma lam hun innghahna pawimawh a nih vanga thawk tur kan ni. Tunlai khawvel inher zelah harsatna thar a lo chhuak zel a, hetiang hre reng chungin humhalhna kan ngai pawimawh tur a ni," a ti.

Kumina Biological Diversity Day thupui chu ‘Harmony with Nature and Sustainable Development’ tih a ni a; Aizawla Day hmannaah hian BMC member te, zirlai te, leilung leh nungcha humhalhna lama hma latu pawlte leh sorkar department hrang hrang aiawhte an tel.

International Day for Biological Diversity 2025 pualin Mizoram State Biodiversity Board chuan high school zirlaite tan painting competition, a duh apiang tan photography competition leh Biodiversity Management Committee (BMC)-te tan signboard siam intihsiakna a buatsaih a; ti ṭhate hnenah EFCC Minister-in lawmman a hlan.

Nungchate humhalha venhim a nih theihna turin United Nations Convention on Biological Diversity chu kum 1992 khan Brazil khawpui Rio de Janeiro-a Earth Summit-ah din a ni a; he Convention-a tel zingah India ram pawh telin, thuthlung (agreement) ziaktu ram 196 zingah a tel a ni.

Thuthlung ziah ni, May 22 chu United Nations chuan 'International Day for Biological Diversity' atan a puang a, kum 2000 aṭang khan kum tin thupui thlan bik neiin hman ṭhin a ni.

LAWMMAN DAWNGTUTE

High School Painting Competition

1-na Layla Zothanpari, St. Pauls HSS

2-na Jayaditya Chowdhury, St. Pauls HSS

3-na R Lalpekhlui, Living Water School

Photography Competition

1-na Paul Lalrambeiseia, Zonuam

2-na Tlauliana, Kulikawn

3-na Lalrinnungi, Bethlehem Vengthlang

Signboard Competition

1-na Thanglailung BMC

2-na North Lungleng BMC

3-na Sialsir BMC