PwD Commissioner-in Hnahthialah sorkar pisa leh zirna-inte a enfiah

Mizoram State Commissioner for Persons with Disabilities (PwD) Vanlaldiki Sailo chuan nimin khan Sugamya Yatra hnuaiah Accessible India Campaign neiin Hnahthial a tlawh a, sorkar hmun pawimawhahte rualbanlote tana remchang leh awlsamna tur siam a nih leh nih loh a endik.

PwD Commissioner hian Deputy Commissioner office, District Hospital, Hnahthial College leh Hnahthial Higher Secondary School-te a tlawh a; rualbanlote thlen phâk leh awlsam zawka dawr theih a nih leh nih loh leh, an tana remchang siam a nih dante a enfiah a ni.

Vanlaldiki Sailo chuan, Accessibility India Campaign hnuaiah rualbanlote pan leh thlen theih lohna a awm em tih enfiah tura kal a nih thu a sawi a, "All India campaign a nih angin state hrang hrangah hmalak mek a ni a, Mizoramah pawh chak taka hmalak a ni. Zirna-in leh sorkar building zawng zawng rualbanlote tana thlen phak a ni tur a ni a, inthiarna pawh rualbanlote hman tur bik siam a ṭul," a ti.

PwD Commissioner chuan, India sorkarin rualbanlote a ngai pawimawh tih sawiin, "Sorkar hun pawimawh leh thil tih kalphung engkim an hriat ve theihna turin sorkar chuan interpreter (sign language thiamte) a hmang uar tawh hle," a ti a; vanduaina vangin zan khat thila rualbanlo thei vek an nihna hriaa theihtawpa rualbanlote tana thawk zel turin a chah.

Hnahthialah hian PwD Commissioner hian inthiarna grab bar leh ramp bakah, signage târ a awm leh awm loh a enfiah. Rualbanloten awlsam zawka pisa an dawr theihna tur te, an inentir theihna tur leh nuam zawka zirna in an kai theihna tura theihtawp chhuah turin chah a, an dikna chanvo humhalhsak zel turin a sawm bawk.