Lungsen Block-a nu leh naute hriselna atana beihpui thlak tur sawiho a ni

Lunglei bawrhsap Navneet Mann hmalaknaa Lungsen Aspirational Block huam chhunga nu leh naupangte hriselna leh chawi kanna tura beihpui thlakna tur, Project Better Living through Outreach, Optimal Maternal & Child Health (BLOOM) kalpui dan tur chungchang May 21, Nilaini khan DC pisaah sawiho a ni.

NITI Aayog hnuaia Aspirational Block Programme-in hriselna leh chawṭha (health & nutrition) chungchanga hmasawnna tehfung atana thlan bik, key performance indicator (KPI) a duan hrang hrangah Lungsen Block-in hma a sawn theihna tur leh, 100% tihhlawhtlin a nih theih nan Project BLOOM ruahman a ni.

BLOOM hnuaiah hian nu nau paite a hun taka chhinchhiah an nih a, chawṭha (supplementary nutrition) ṭha taka an dawn theih nan leh, damdawi-inah ngei nau an neih theih nan te, nausen leh naupangte'n an ṭhan lenna atana mamawh khawp chawṭha an hmuh a, an hrisel theih nan leh nu leh naupangte tana sorkar ruahmanna hrang hrang awmte a chhawr turte'n an hriata an chhawr ngei theih nante hmalak a ni ang.

Project BLOOM hi June 2025 tirah ṭan tura ruahman a ni a, Lungsen Primary Health Centre (PHC)-ah hawn an rel. Project hnuaiah hian Lungsen BDO kaihhruaina hnuaiah Lungsena CDPO leh PHC medical officer ten a tam thei ang ber campaign leh awareness kalpui turin ruahmanna lo siam se, an ti.

Lunglei District Immunisation Officer chuan Lungsen Block chhunga hri danna (immunisation) pek dan tur ruahmanna siamin, hri danna pek kawngah leh hriselna chungchangah hmasawnna a awm zel theih nan hmalak ni se, an ti a; nuin nau an pai aṭanga thla thum chhunga inziak lut (register)-te hnena pek atan special gift basket buatsaih tum a ni bawk.