Mamitah zirlaite tan intihsiak buatsaih

Samagra Shiksha, Mamit district bultumin nimin khan Mamit IPR conference hall-ah high school leh higher secondary school zirlaite pualin 'Youth & Eco Club Plan for Generation Restoration Competition' buatsaih a ni.

Intihsiakna thupui chu 'Restoring, Regenerating, Renewing, Reusing, Regreening, Rewilding' tih a ni a, Mamit district-a H/S pariat leh HSS pathum an tel. Pakhatnain Rs 10,000, pahnihnain Rs 8,000 leh pathumnain Rs 5,000 an dawng a ni.

Mamit district education officer K Lalnunfela chuan, thiamna sang zelin mihring chenna leilung leh a chhunga awmte a tihchhiat nasat thu sawiin, nasa taka hma la turin zirlaite'n mawh an phurh thu a sawi a, "Kan khawvel a chhiat zel lohna turin kan thiamna leh theihna i hmang ṭheuh ang u," a ti.

Intihsiakna hi Kawrthah SDEO Francis Lalruattluanga, Mamit DIET lecturer Ramthanpari leh Mamit Forest Division forest ranger Royal L Mihriema ten an endik a ni.