KHAWTHLIR

CM Delhi-ah

Chief minister Lalduhoma chuan NITI Aayog Governing Council leh Raising NE: Investors Summit 2025-a tel tur leh sorkar laipui hotute dawr turin nimin khan Delhi-ah a pan. CM hi secretary to CM Vanlaldina Fanai leh official dangte'n an ṭawiawm a ni. NITI Aayog hi Union Cabinet-in kum 2015 a a din a ni a, Prime Minister chu chairman niin state leh UTs zawng zawng Chief Minister-te chu member an ni. NITI Aayog bultum hian Viksit Bharat 2047 kalpui mek a ni a, kum 2047 hmaa India ram chu ram changkang a hlankai tumna a ni.

Ruihhlo kaihhnawih helpline siam

Khawzawl District Level Narco Coordination Centre (NCORD) chuan ruihhlo leh a kaihhnawih thila mipuite'n thuneitute englai pawha an biak zung zung theih nan helpline number an siam a, Khawzawl district mipuite'n engtik hunah pawh phone call emaw, Whatsapp emaw kaltlangin a biakpawh theih a ni. Helpline hi Khawzawl district-ah ruihhlo a tlem theih nan leh ruihhlo laka mipui an lo fihlim zawk theihna tura duan a ni a, helpline no. chu 8119080266 a ni.

Missionary Retreat

Synod Mission Board chuan nizan aṭang khan Dawrpui Vengthar Kohhran biak-inah Missionary Retreat an buatsaih ṭan a, May 25, Pathianni zanah a ṭiak ang. Missionary Retreat hi Home Mission leh Cachar Tlangram field-a awmte tana buatsaih a ni a, thupui chu 'Thiltihtheihnaa thuam' tih niin, speaker tur chu Rev. Lalsangbera a ni.

Sum enkawl dan inzirtir

Synod Finance department chuan nimin khan Synod Office-a JM Lloyd Hall-ah pastor bial treasurer-te pualin training an buatsaih a, pastor bial hrang hrang aṭangin bial treasurer 101 an tel. Synod accountant Zaihmingthanga Fanai-in 'Synod Financial Rules leh tunlai thil tharin sum vawn leh enkawl chungchang a khawih dante' a zirtir a, finance manager Upa F Lalhmangaiha'n 'Tunlai thil thar leh income tax laka harsatna awm theite' tih a zirtir bawk.