LGBTQI+ survey neih a ni dawn

Mizoramah Lesbian, Gay, Bisexual, Transgender, Queer, Intersex etc, (LGBTQI+) survey neih a ni dawn a; Social Welfare department hnuaiah Mizoram Psychological Association (MPA) leh Mizoram Professional Social Workers' Association (MPSWA)-ten hma an la dawn.

Social Welfare minister Lalrinpuii hoin nimin khan sorkarin LGBTQI+ chungchang a buaipui dan leh hmalak zel dan tur sawiho a ni a; sorkar laipuiin LGBTQI+ te chungchang hi a ngaih pawimawh avangin an pualin portal a siam thu te, an dinhmun tak hre tur leh ṭanpui tur chuan sorkarin data a neih a ṭul thute sawi a ni.

Ṭhukhawm chuan, Mizorama LGBTQI+ te dinhmun hrechiang tura zirchianna (survey) nei turin Mizoram Psychological Association (MPA) leh Mizoram Professional Social Workers' Association (MPSWA)-te thiamna leh tha chakna hman ni se, he mi atan hian department lamin proposal mumal tak siam se, an ti.

He hunah hian Social Welfare department, Home department leh Health department hotute bakah, MPA leh MPSWA hruaitute an tel.