Police in ruihhlo ṭhahnem tak an man
Mizoram Police-te chuan tun hnai khan ruihhlo chi hrang hrang ṭhahnem tak hmun hrang hrangah an man a, a kaihhnawihah mihring eng emaw zat an man. Ruihhlo avanga mante lakah hian thubuai ziahluh a ni.
Ruihhlo an man chungchanga Mizoram Police thuchhuah tarlan danin, CID Crime hnuaia Special Narcotics PS-te chuan an thu dawn bawhzuiin May 22, 2025 khan Selesihah operation an nei a, C Zosangluri (34) d/o Zovalliana, College Veng, Aizawl hnen aṭangin codeine bur 597 (kg. 80.495) an man.
C Zosangluri inpuanna bawhzui hian Ramthar Venga kudam pakhat chu Health department drugs inspector hoin enfiah a ni a, codeine bur 1,292 (kg 179.405) man belh leh a ni. Codeine hi a vaiin bur 1,889 niin, tualchhung rate angin cheng nuai 9.44 hu a ni.
May 19, 2025 zan khan Tuisenphai check gate-a Khawzawl District Police duty-te chuan methamphetamine kg. 4.742 (mum 40,400), nuai 61.64 man hua chhut chu taxi, MZ/04 - 9044 aṭangin an man. Taxi khalhtu Vanlaldampuia (26) s/o Vanlalhluta, Tuipui, Champhai District nia inchhal pawh an man nghal.
May 18, 2025 zing khan CID (SB) Team leh Special Narcotics Police Station-te chuan Seling, Aizawl district-ah joint operation an nei a, methamphetamine kg 39.15 (packet 40), cheng nuai 508.96 man hu chu Lalkrossmawia (41) s/o Roenga, Letpanchaung, Myanmar hnen aṭangin an man.
Lalkrossmawia'n metham-phetamine phurhna atana a hman 407 truck MZ/01 M - 1935 leh a khalhtua puh Ramropuia (25) s/o Runliansanga, Tahan, Myanmar nia inchhal pawh an man nghal. Methamphetamine hi truck hnuaia thira siam compartment chhungah thuhruk a ni. May 17, 2025 zing khan Saitual Police Special Team chuan lirthei pahnih, MZ/01 B - 7815 Hyundai 10 (silver rawng), Joseph Vanlalhlana s/o Zabiaka, Zokhawthar nia inchhal khalh aṭangin heroin kg 1.14 (hawng 100), a kawngka frame chhunga thuhruk man a ni a, cheng nuai 50 man hua chhut a ni.
Police-te chuan chhuizui nghalin, Bittu Chhetry (20) s/o Vijay Chhetry, Bualpui Hmar Veng; Naruj Jaman Laskar (18) s/o Ainul Haque Laskar, Lailapur, Assam; Lalpekmuani (28) w/o Laldanena, Rangvamual Farm Veng leh Rodinliani (33) w/o Vanlaltluanga, Rangvamual Farm Vengte chu Tuikhurhlu leh Seling inkarah Seling Police Check Post-a duty-te puihnain an man belh.
RUIHHLO MAN DAN :
* May 22-ah codeine bur 1,889, cheng nuai 9.44 man hua chhut
* May 19-ah methamphetamine kg. 4.742, cheng nuai 61.64 man hua chhut
* May 18-ah methamphetamine kg 39.15, cheng nuai 508.96 man hua chhut
* May 17-ah heroin kg. 1.14, cheng nuai 50 man hua chhut