Khawzawl District MJA hawn a ni

Nimin tlai khan Khawzawl District MJA chu Khawzawl DC Auditorium-ah MJA Gen. Hqrs. president C Lal-rambuatsaiha'n a hawng.

C Lalrambuatsaiha chuan, Khawzawl District MJA hawn a ni ta chu MJA tan bakah Khawzawl district tan thil chhinchhiah tlak tak a nih thu sawiin, "Chanchinbumite hi sorkar kutke pawimawh tak an ni. Langtlang taka sorkar a kal a, dik taka ro a rel theih nan chanchinbumite hi hmanraw ṭangkai tak an nih angin sorkar pawhin a theihna zawn zawnah a duhsak ṭhin. Hetihrual hian, chanchinbumite chu sorkar thu thuin an awm tihna a ni lo a, sorkar kalphunga thil fel tawk lo leh dik tawk lo awm puanzar kawngah an tîm mai tur a ni lo," a ti.

MJA President hian Khawzawl District MJA indan nan MJA Gen. Hqrs. hmingin Rs 20,000 a hlan nghal a ni.

Khawzawl DC K Vanlalṭhiana pawhin thu sawiin, "Khawzawl District MJA hawn a ni ta hi a lawmawm hle," a ti a; chanchinbumite chu mipui rilru sukthlek kaihruaitu an nih angin an thu chhuah turah ngaihtuahna fim tak hmang tur leh mipuite pawh social media-a thu leng vakah innghat mai lo turin a chah bawk

Khawzawl District MJA hruaitu atan president-ah Lalthlamuani Ralte, vice president-ah Lalrotluanga, treasurer-ah Rohmingthanga leh secretary-ah Vanlalzawna Ralte-te ruat an ni.